މަގުމަތީ ޙަރަކާތް ވަރުގަދަ ކުރަން ރައީސް ޔާމީން އެދިލައްވައިފި!
ކުރީގެ ރައީސް ޔާމީން މިނިވަންވަންދެން މަގުމަތީގައި ހިންގާ ޙަރަކާތްތައް ވަރުގަދަކުރުމަށް ޕީޕީއެމް/ޕީއެންސީ ކޯލިޝަން އިސްބޭފުޅުންނަށާއި ސަޕޯޓަރުން ކިބައިނއ އެމަނިކުފާނު އެދިވަޑައިގެންފިއެވެ.
އެމަނިކުފާނު މިހެން ވިދާޅުވީ ހުޅުމާލެ ކެންޕެއިން ޓީމުން އެމަނިކުފާނަށް ފަރިވަޅެއް އެރުވުމަށް ރޭ ބޭއްވި ޙަރަކާތުގައި އެމަނިކުފާނުގެ ގެކޮޅުގައި ހުންނަވައިގެން ސަޕޯޓަރުންނާއި ވާހަކަ ދައްކަވަމުންނެވެ.
ރައީސް ޔާމީން ވަނީ އެމަނިކުފާނު މިނިވަންކޮށްދެއްވުމަށް ކުރާ މަސައްކަތުގައި ވީހާވެސް ގިނަ ބޭފުޅުން ބައިވެރިވަޑައިގެންނެވުމަށް އެދިވަޑައިގަންނަވާފައެވެ. އަދި މަގުމަތީގެ ހަރަކާތްތައް ހިންގައިގެން ފުލުހުން ދެން ހައްޔަރުކުރަން ނާންނާނެކަމަށާއި އަނިޔާވެރިވާން ނާންނާނެކަމަށް އެމަނިކުފާނު ވަނީ ވިދާޅުވެފައެވެ.
ރައީސް ޔާމިނަށް ވަނީ މަނީ ލޯންޑަރިންގެ ކުށް ސާބިތުވެ 11 އަހަރަށް ޖަލަށްލުމަށް ޙުކުމްކޮށްފައެވެ. އަދި ނިމިދިޔަ ރިޔާސީ އިންތިޚާބުގައި ޑރ. މުޙައްމަދު މުޢިއްޒު ކާމިޔާބު ކުރެއްވުމާއި ގުޅިގެން ރައީސް ޔާމިން ވަނީ ގޭބަންދަށް ދޫކުރައްވާފައެވެ. އެމަނިކުފާނު ގެއަށް ބަދަލުކުރެއްވުމާއި ގުޅިގެން މަރުޙަބާ ދެންނެވުމަށްޓަކައި ޕީޕީއެމް/ޕީއެންސީގެ އެތައް ސަތޭކަ ސަޕޯޓަރުންނެއް ވަނީ އެމަނިކުފާނުގެ ގެކޮޅު ހ. ދޫވެހި ކައިރިއަށް އެއްވެފައެވެ.
އެމަނިކުފާނު ގެކޮޅަށް ވަޑައިގެންނެވުމާއެކު އިންތިޚާބީ ރައީސް ޑރ. މުއިއްޒު އާއި އިންތިޚާބީ ނާއިބު ރައީސް ޙުސައިން މުޙައްމަދު ލަތީފް އާއި ޕީޕީއެމް/ޕީއެންސީގެ ލީޑަރޝިޕްގެ ބޭފުޅުން ވަނީ މަރުޙަބާ ދަންނަވާފައެވެ.
މިލިޔުން ކިޔާލުމުން
