ފޮނަދޫ ދާއިރާގެ ބާތިލް ވޯޓު އަލުން ގުނަން ނިންމައިފި

މިމަހުގެ 6 ވަނަދުވަހު ބޭއްވި ރައްޔިތުންގެ މަޖިލީހުގެ އިންތިހާބުގައި ފޮނަދޫ ދާއިރާގެ ފޮށިތަކުގެ ތެރިން ބާތިލް ވޯޓު ހުރި ހުރިހާ ފޮއްޓެއްގެ ބާތިލް ވޯޓު އަލުން ގުނަން އިލެކްޝަންސް ކޮމިޝަން (އީސީ) އިން ނިންމައިފި އެވެ.

އީސީން ބުނީ ފޮނަދޫ ދާއިރާގެ ފޯޓް ފޮށިތަށް ގުނަން ނިންމީ އެ ދާއިރާތަކުން އިންތިހާބުގައި ނާކާމިޔާބިއާ ކުރިމަތިވި ޕީޕީއެމާއި ޕީއެންސީން ހުށަހެޅުމުން ކަމަށެވެ.

އިޝްތިހާރު

ފޮނަދޫ ދާއިރާގެ އިންތިހާބުގައި މިހާރުގެ މެންބަރު، ވަގުތީ ލީޑަރު އަބްދުއްރަހީމް އަބްދުﷲ (އަދުރޭ) އަށް ނާކާމިޔާބީއާ ކުރިމަތިވެ ވަޑައިގަތީ އެމްޑީޕީގެ ކެންޑިޑޭޓް މަސްހޫރު ޤާނޫނީ ވަކީލް މޫސާ ސިރާޖާ ވާދަކުރައްވައިގެންނެވެ. ސިރާޖަށް 1،007 ވޯޓު ލިބިވަޑައިގެން އިރު އަދުރޭ އަށް ލިބިވަޑައިގަތީ 963 ވޯޓެވެ.

އީސީން ފޮނަދޫ ދާއިރާގެ ވޯޓް ފޮށިތަށް އަލުން ގުނަން ނިންމިއިރު، މި ފޮށިތަށް އަލުން ގުނާނެ ވަކި އިރެއް އަދި ހާމައެއް ނުކުރެ އެވެ.

ވޯޓު ކަރުދާހުގައި ރަނގަޅު ފާހަގަ ޖެހުން ފިޔަވައި އެހެން ފާހަގައެއް ޖަހައި ކުރަހައި ނުވަތަ ކަރުދާހަށް ގެއްލުން ދިނުން ފަދަ ކަމެއް ކޮށްފި ނަމަ ވޯޓު ބާތިލްވާ ގޮތަށް ވަނީ އިންތިހާބުތަކާ ބެހޭ ގާނޫނު އިސްލާހުކޮށްފަ އެވެ. މި ބަދަލާ އެކު މިފަހަރު ބާތިލް ވޯޓުގެ އަދަދު އެހެން ފަހަރުތަކާ އަޅާބަލާއިރު ގިނަ އެވެ.