އަދުގެ ދުނިޔޭގައި އާދަކާދައާއި ސަގާފީ ތަރިކައަކީ އަގުބޮޑު މުދަލެއް: ޔުމްނާ

އަދުގެ ދުނިޔޭގައި އާދަކާދައާއި ސަގާފީ ތަރިކައަކީ އަގުބޮޑު ’މުދަލެއް‘ ކަން ދެނެގަނެ، ދެމެހެއްޓެނިވި ގޮތެއްގައި އޭގެ ބޭނުން ރަނގަޅުގޮތުގައި ހިފުން މުހިންމު ކަމަށް ފަންނާއި ސަގާފަތާއި ތަރިކައިގެ ވަޒީރު ޔުމްނާ މައުމޫން ވިދާޅުވެއްޖެ އެވެ.

އެކަމަނާ މިހެން ވިދާޅުވީ ދުނިޔޭގެ ތަރިކައިގެ ދުވަހުގެ މުނާސަބަތުގައި ނެރުއްވި ޚިތާބުގަ އެވެ.

އިޝްތިހާރު

އެ ޚިތާބުގައި އެކަމަނާ ވިދާޅުވީ ސަގާފީ ތަރިކަ ދަފްތަރުކޮށް، ރައްކާތެރިކޮށް، އަދުގެ ޖީލަށާއި އަންނާން އޮތް ޖީލުތަކަށް ފޯރުކޮށްދީ، ސަގާފީ ތަރިކައަށް ހޭލުންތެރި ޖީލެއް ބިނާކުރުމަކީ އަޅުގަނޑުމެން އެންމެންގެ ޒިންމާއެއް ކަމުގައި ހަދައި އެންމެންގެ ބައިވެރިވުމާއެކީ ގުޅިގެން މިކަން ކުރުމަށް ގޮވާލައްވާ ކަމަށެވެ.

”އަޅުގަނޑުމެންގެ ސަގާފީ ތަރިކައަކީ އަޅުގަނޑުމެންގެ ފަޚުރަކަށް ވާއިރު، ސަޤާފީ ތަރިކަ ރަނގަޅު ގޮތުގައި ރައްކާތެރިކޮށް ދެމެހެއްޓިއްޖެނަމަ، ސަގާފީ ފަތުރުވެރިކަމުގެ ތެރެއިން ރަށަށާއި އަތޮޅަށް އެތައް ފައިދާތަކެއް ލިބިގެންދާނެ ކަން ޔަގީން. އަދި ދުނޔޭގައި ދިވެހިރާއްޖެއަށް ރީތި ނަން ލިބިގެން ދާނެ. ދިވެހިރާއްޖެ ފަދަ ކުޑަކުޑަ ޖަޒީރާ ޤައުމަކަށް ގައުމުގެ އަމިއްލަ ޝަޚްސިއްޔަތު ދެމެހެއްޓޭނީ ސަގާފީ ތަރިކަ ރައްކާތެރިކުރެވުނު މިންވަރަކުން.“ ޔުމްނާގެ ޚިތާބުގައި ވިދާޅުވެފައި ވެއެވެ.

މީގެ އިތުރުން ސަގާފީ ފަތުރުވެރިކަމުގެ ތެރެއިން ރަށްރަށަށް ފައިދާތައް ލިބި ދުނިޔޭގެ ފެންވަރުގައި ދިވެހިރާއްޖޭގެ ސަގާފީ ތަރިކައިގެ އަހަމިއްޔަތުކަން އިތުރުކުރެވިދާނެ ކަމަށް ވެސް ވިދާޅުވެފައި ވެއެވެ. އެހެންކަމުން ދެމެހެއްޓެނިވި ތަރައްޤީއަށް ސަގާފީ ފަތުރުވެރިކަން ކުރިއެރުވުމަކީ މުހިންމުކަމަށް ވެސް ވަނީ ވިދާޅުވެފަ އެވެ.

ދިވެހިރާއްޖޭގެ އެކި ކަންކޮޅުތަކުގެ ސަޤާފަތަކީ ގުޅިލާމެހިފައިވާ އެއްޗެއް ކަމަށާއި ވޭތުވެ ދިޔަ ޒަމާންތަކުގައި ދިވެހީންގެ މަސައްކަތްތެރިކަން ދައްކުވައިދޭ އާސާރީ ތަންތަނާއި ތަކެތި އޮޅުންފިލާނޭހެން މި ޒަމާނާ ހަމައަށް ވާރުތަވެގެން އައިސްފަވައިވާ ކަމީ އަޅުގަނޑުމެން ޝުކުރުވެރިވާންޖެހޭ ކަމެއް ކަމަށް ވެސް ވިދާޅުވެފައި ވެއެވެ.

“ ދިވެހިރާއްޖޭގެ އެކި އަތޮޅުތަކަށާއި ރަށްތަކަށް ބަލާއިރު ދިވެހީންގެ ސަގާފީ ތަރިކައިގެ މުއްސަނދިކަމާއި ތަފާތުކަން ދޭހަވޭ. ތަރިކައިގެ ތެރެއިން ފެންނާން ހުރި ބިނާތަކާއި، އިހުގެ ތާރީޚާއި ގުޅިފައިވާ އެކިއެކި ތަކެތި މި ރާއްޖޭގެ އެކި ހިސާބުތަކުގައި ފެންނާން ހުރީ އެކި ރަށްރަށަށް، އަދި އަތޮޅަކަށްވެސް ޚާއްސަ ސިފަތާއިއެކު. އަޅުގަނޑުމެންގެ މުއްސަނދި މާޒީތަކުން އައިސްފައިވާ ސަގާފީ ތަރިކަތައް ކުރިމަގުގެ ޖީލުތަކަށް ރައްކާތެރިކަމާއެކު ފޯރުކޮށްދިނުމަކީ އަޅުގަނޑުމެން އެންމެންގެ ޒިންމާއެއް. މި ފަދަ ބިނާތަކާއި ސަރަހައްދުތަކާއި ތަންތަނާއި ތަކެއްޗަކީ އެ ރަށެއްގެ އަމިއްލަ ވަންތަކަމާއި ސަގާފަތް ދައްކައިދޭ ތަންތަނާއި ތަކެތި. މި ފަދަ ބިނާތަކާއި ސަރަހައްދުތަކީ ރަށުގެ ނުވަތަ އަތޮޅުގެ ކުރިމަގު ބިނާ ކުރާއިރުވެސް މުހިންމު ތަންތަނާއި ތަކެތި. ފަތުރުވެރީން ބަލައިލަން ބޭނުންވާނެ ބިނާ ތަކާއި، ސަރަހައްދުތަކާއި ތަކެތި.“ މިނިސްޓަރ ގެ ޚިތާބުގައި ވިދާޅުވެފައި ވެއެވެ.

މި އަހަރުގެ ދުނިޔޭގެ ތަރިކައިގެ ދުވަހުގެ ޝިޢާރަކީ ”މުއްސަނދި މާޒީތަކަކުން: ތަފާތު ކުރިމަގުތަކަކަށް“ ނުވަތަ ”ކޮމްޕްލެކްސް ޕާސްޓްސް: ޑައިވަރސް ފިއުޗަރ“ އެވެ.