ފްރެންޗް ލީގް: މެޓްޒް ބަލިކޮށް ޕީއެސްޖީ ލީގުގެ އެއްވަނައަށް
ފްރެންޗް ލީގުގައި ހޮނިހިރު ދުވަހުގެރޭ މެޓްޒް އާއި ދެކޮޅަށް ކުޅުނު މެޗުން މޮޅުވެ ޕޮއިންޓު ތާވަލުގެ އެއްވަނައަށް އެންމެ ފަހުގެ ޗެމްޕިއަން ޕީއެސްޖީ ޖެހިލައިފިއެވެ.
މެޓްޒް ދަނޑުގައި ކުޅުނު މި މެޗުން ޕީއެސްޖީ މޮޅުވީ 1-3 ގެ ނަތީޖާއަކުންނެވެ.
މި މެޗުގައި ޕީއެސްޖީން މޮޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލަނޑު ޖަހާ މެޗުގެ ލީޑު ނަގާފައެވެ. މެޗު ފަށައިގެން ހަތަރުވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އެމްބާޕޭއެވެ.
އެއް ލަނޑުގެ ލީޑެއްގައި އޮވެ މެޗުގެ ފުރަތަމަ ހާފު ޕީއެސްޖީން ނިންމާލި ނަމަވެސް ދެވަނަ ހާފު ފަށައިގެން ފުރަތަމަ މިނެޓުގައި މެޓްޒް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފައެވެ. މި ލަނޑު އެޓީމަށް ޖަހައިދިނީ ފަބިއަން ސެންޓޯޒްއެވެ.
ނަމަވެސް މެޗުގެ 59 ވަނަ މިނެޓުގައި ޕީއެސްޖީން ވަނީ މެޗުގެ ދެވަނަ ފަހަރަށް ލީޑުނަގާފައެވެ. މިފަހަރުވެސް ޕީއެސްޖީއަށް ލީޑުނަގައިދިން ލަނޑު ކާމިޔާބުކޮށްދިނީ އެމްބާޕޭއެވެ. ޕީއެސްޖީގެ ތިންވަނަ ލަނޑު ކާމިޔާބުކުރީ މެޗު ނިމެން މިނެޓަކަށް ވެފައި ވަނިކޮށް ލިބުނު ޕެނަލްޓީއަކުން މައުރޯ އިކާޑީ އެވެ.
މި މޮޅާއެކު ތާވަލުގެ އެއްވަނައަށް ޕީއެސްޖީ ޖެހިލީ ކުޅުނު 34 މެޗުން ލިބުނު 72 ޕޮއިންޓާއެކުއެވެ. ދެވަނައިގައި އޮތް ލިލްއަށް 33 މެޗުން ލިބިފައިވަނީ 70 ޕޮއިންޓެވެ.
މިލިޔުން ކިޔާލުމުން
