ކޮވިޑުގައި މިއަދު 2 މީހުން މަރުވި އިރު، ޕޮޒިޓިވް ކޭސްތައް 400 އިން މައްޗަށް އަރައިފި

ފާއިތުވި 24 ގަޑި އިރުގެ ތެރޭގައި ރާއްޖެއިން ކޮވިޑު ބަލީގައި 2 މީހުން މަރުވި އިރު، ޕޮޒިޓިވް ކޭސްތައް 400 އިން މައްޗަށް އަރައިފި އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ފާއިތުވި 24 ގަޑި އިރުގެ ތެރޭގައި 464 މީހުން ކޮވިޑަށް ޕޮޒިޓިވް ވެފައިވާ ކަމަށެވެ.

އިޝްތިހާރު

އެއީ މާލެ ސަރަހައްދުން 207 މީހަކާއި އަތޮޅުތެރެއިން 146 މީހަކާއި އޮޕަރޭޝަނުގައި ހުރި ރިސޯޓުތަކުން 14 މީހަކާއި ސަފާރީތަކުން ތިން މީހަކު ޕޮޒިޓިވް ވެފައިވާ އިރު، ރިސޯޓެއްގެ ގޮތުގައި ތަރައްގީކުރާ ރަށަކުން މީހަކާއި ސިނާއީ މަސައްކަތްކުރާ ރަށްތަކުން 93 މީހުން ވެސް ޕޮޒިޓިވް ވެފައިވާ ކަމަށް ވަނީ ބުނެފަ އެވެ.

މިފަހަކަށް އައިސް ރާއްޖޭގެ ކޮވިޑު އަދަދުތައް ރާއްޖޭގައި އަންނަނީ އިތުރުވަމުން ނެވެ. އެގޮތުން މިދިޔަ ހުކުރު ދުވަހު 319 މީހުން ޕޮޒިޓިވް ވެފައިވާ އިރު، ހޮނިހިރު ދުވަހު 218 މީހަކު ވަނީ ޕޮޒިޓިވްވެފަ އެވެ. އަދި އާދީއްތަ ދުވަހު 253 މީހަކު ޕޮޒިޓިވްވެފައިވާ އިރު، ހޯމަ ދުވަހު 328 މީހަކު، އަދި އިއްޔެ ވަނީ 386 މީހަކު ކޮވިޑަށް ޕޮޒިޓިވް ވެފަ އެވެ.

ރާއްޖޭގައި ކޮވިޑަށް ފަރުވާ ހޯދަމުންދިޔަ މީހުންގެ ތެރެއިން މިދިޔަ 24 ގަޑިއިރުގެ ތެރޭގައި 76 މީހުން އެބަލިން ރަނގަޅުވެފައިވާ އިރު، ބަލިން ފަސޭހަވީ މީހުންގެ އަދަދަކީ 24،575 އެވެ.

މިހާރު ރާއްޖޭގައި ބައްޔަށް ފަރުވާދެމުން އަންނަނީ 4،396 މީހަކަށް ކަމަށާއި ހޮސްޕިޓަލުތަކުގައި 122 މީހަކު އެބަ ތިބިކަމަށް ވެސް އެޗްޕީއޭ އިން ބުނެ އެވެ.

ރާއްޖޭގައި ކޮވިޑު ބައްޔަށް ފަރުވާ ހޯދަމުން އަންނަ މީހުންގެ ތެރެއިން އިތުރު މީހގަކު ވެސް މިއަދު ވަނީ މަރުވެފަ އެވެ.

އެޗްޕީއޭ އިން ބުނީ، ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ކޮވިޑަށް ފަރުވާ ހޯދަމުން ދަނިކޮށް މަރުވެފައިވަނީ އިންޑިއާ މީހެއް ކަމަށެވެ. އަދި އެއީ އުމުރުން 50 އަހަރުގެ ފިރިހެނެއް ކަމަށެވެ.

ރާއްޖޭގައި ކޮވިޑަށް ފަރުވާ ހޯދަމުން ދިޔަ އުމުރުން 85 އަހަރުގެ މީހަކު ވެސް މިއަދު ވަނީ މަރުވެފަ އެވެ. އޭނާއަކީ ވެސް ދަރުމަވަންތަ ހޮސްޕިޓަލުގައި ކޮވިޑަށް ފަރުވާ ހޯދަމުން ދިޔަ މީހެކެވެ.

މިއާއެކު 73 މީހުން މިހައިތަނަށް ވަނީ މަރުވެފަ އެވެ.

މިރޭ މަރުވި އިންޑިއާގެ މީހާގެ އިތުރުން ދެން މަރުވެފައިވަނީ 65 ދިވެހިންނާއި ބަންގްލަދޭޝްގެ ހަ މީހަކާއި ފިލިޕީންސް މީހެކެވެ.

ކޮވިޑުގައި އެންމެ ފުރަތަމަ ރާއްޖެއިން މީހަކު މަރުވެފައިވަނީ މިދިޔަ އަހަރުގެ އޭޕްރީލް މަހުގެ 29 ވަނަ ދުވަހު، އުމުރުން 83 އަހަރުގެ ދިވެހި އަންހެނެކެވެ.