މަނަދޫ ރަންތަރި 1444 އަށް ފާޠިމަތު އިޔާޝާ ހޮވިއްޖެ!
މިއީ އަތޮޅުފެންވަރުގައިވެސް މިއަހަރު ބޭއްވުނު އެންމެ އަގުބޮޑު މުބާރާތް
މަނަދޫ ކައުންސިލުގެ ފަރާތުން ރާވަައި، އައުޓްސޯސް އުސޫލުން ޗެސްޓަރ ޖަމިއްޔާގެ ފަރާތުން އިންތިޒާމުކޮށް މިއަހަރުގެ ރަމަޟާން މަހު ކުރިޔަށް ގެންދިޔަ “މަނަދޫ ރަންތަރީ1444” މުބާރާތުގެ ފަޚުރުވެރި 1 ވަނަ އެރަށު ގަނދަކޯޅިމާގޭ، ފާތިމަތު އިޔާޝާ ހާސިލްކޮށްފިއެވެ.
މިރޭ ކުރިއަށް ދިޔަ މިމުބާރާތުގެ ފަހު މަރުޙަލާގައި އޮތީ ޤުރުއާން ތަރުޖަމާ ކިޔުމުގެ ބައެވެ. ޤުރުއާން ކިޔެވުމުގެ ބައި ނިމިފައިވަނީ ރޭގައެވެ. އެއާއިއެކު މުބާރާތުގެ ގަދަ ހައެއް ހޮވާފައިވާއިރު މުބާރާތުގެ 1 ވަނަ 2 ވަނަ އަދި 3 ވަނަ ވަނީ ހޮވާފައެވެ. މުބާރާތުގެ 2 ވަނަ ހޯދާފައިވަނީ އިރްތިޝާމް އަޙްމަދު ނަޢީމެވެ. އަދި 3 ވަނަ ހޯދާފައިވަނީ ފާރިޝާ މުޙައްމަދެވެ.
މުބާރާތުގެ 1 ވަނައަށް ހޮވުނު ފަރާތަށް ވަނީ ހިޖާޒް ޙައްޖު އެންޑް ޢުމްރާގެ ފަރާތުން ޢުމްރާ ދަތުރެއް ހަދިޔާކޮށްފައެވެ. އަދި މީގެ އިތުރުން މުބާރާތުގެ 1 ވަނައަށް، 15000 (ފަނަރަ ހާސް) ރުފިޔާގެ ނަގުދު ފައިސާގެ އިނާމު ވަނީ ލިބިފައެވެ. މުބާރާތުގެ 2 ވަނައަށް 10000 (ދިހަހާސް) ރުފިޔާގެ ފައިސާގެ އިނާމު ލިބިފައިވާއިރު މުބާރާތުގެ 3 ވަނަ ފަރާތަށް 5000 (ފަސްހާސް) ރުފިޔާގެ އިނާމު ވަނީ ލިބިފައެވެ. މީގެ އިތުރުންވެސް މުބާރާތުގެ ގަދަ ހަޔަކަށް އަދި އެހެންވެސް ވަނަތަކަށް އެކި ފަރާތްތަކުން ގިނަ އިނާމު ތަކެއް ވަނީ ދީފައެވެ.
މިރޭގެ ޝަރަފްވެރި މެހްމާނަކީ ނ.އަތޮޅު މަދަރުސާގެ ޕްރިންސިޕަލް، އަލްފާޟިލް ޢަބްދުﷲ ޢީސާއެވެ. މިމުބާރާތަކީ ފުރިހަމަ މުބާރާތެއް ކަމަށާއި، އަދި ބައިވެރިން އިތުރުކުރެވޭނެ އިތުރުގޮތްތައް ރާވައި، މިގޮތުން، އޮޑިޝަންއެއް ބާއްވައިގެން ނުވަތަ، އުމުރުފުރާ އިތުރުކޮށްގެން ނަމަވެސް މިމުބާރާތް އިތުރަށް ފުޅާކުރަން ޖެހޭކަމުގައި ޝަރަފްވެރި މެހްމާން ފާހަގަކުރެއްވިއެވެ. މަނަދޫ ރަންތަރި1444 ގައި ކިޔެވީ ޖުމްލަ 11 ބައިވެރިންނެވެ.
މީގެ އިތުރުން މިރޭ ވަނީ މުބާރާތުގެ ފަނޑިޔާރުންނަށާއި، މުބާރާތަށް އެހީތެރިވި ފަރާތްތަކަށާއި މުބާރާތުގެ ބައިވެރިންނަށް ހަނދާނީ ލިޔުމާއި، ފިލާ އަދި އިނާމު ދީފައެވެ. އަދި ޝަރަފްވެރިކަމުގެ އިނާމުގެ ގޮތުގައި، މަނަދޫގައި ޤުރުއާނުގެ ދާއިރާއަށް ގިނަ ޚިދުމަތްތަކެއް ކުރައްވާފައިވާ ފަރާތަކަށް އިނާމު ދީފައިވާއިރު މުބާރާތުގެ ހަމައެކަނި ފިރިހެން ބައިވެރިޔާ ކަމުގައިވާތީ ޝަރަފްވެރިކަމުގެ އިނާމުވެސް ވަނީ ބައިވެރިއަކަށް ދީފައެވެ.
މިލިޔުން ކިޔާލުމުން
