ވެލިދޫގެ ރައްޔިތުންގެ ހިތްތަކުގައި ކީރިތި ޤުރުއާން ކިޔެވުމަށް ލޯބިޖައްސައި ޤުރުއާން ކިޔެވުމުގެ ފަންނު ދިރުވައި، އާލާކޮށް، ފެތުރުމަށް މަސައްކަތް ކުރުމުގެ މަޤްސަދުގައި ހުރިހާ އުމުފުރާއަކަށް ހުޅުވާލައިގެން، މިހިނގާ 1444ވަނަ އަހަރު ކީރިތި ޤުރުއާން ކިޔެވުމުގެ މުބާރާތެއް ބޭއްވުމަށް ހަމަ ޖެހިފައިވާ ކަމަށް ނ.ވެލިދޫ ކައުންސިލުން އިޢުލާން ކޮށްފިއެވެ. ކައުންސިލުން ހާމަކޮށްފައިވާ ގޮތުގައި މި މުބާރާތް ބޭއްވުމަށް ގަސްދުކުރެވިފައިވަނީ 16 ޖޫން 2023 ވާ ހުކުރު ދުވަހުއެވެ.
މިމުބާރާތް ކުރިއަށް ގެންދިއުމަށް ހަމަޖެހިފައިވަނީ 7 އުމުރުފުރައަކަށް ބަހާލައިގެންނެވެ. އެގޮތުން މުބާރާތް ހުޅުވާލެވިފައިވާ ޢުމުރުފުރާ ތަކަކީ،
އިޝްތިހާރު 
4 އަހަރާއި 6 އަހަރާއި ދެމެދު،
7 އަހަރާއި 9 އަހަރާއި ދެމެދު،
10 އަހަރާއި 12 އަހަރާއި ދެމެދު،
13 އަހަރާއި 14 އަހަރާއި ދެމެދު،
15 އަހަރާއި 17 އަހަރާއި ދެމެދު،
18 އަހަރުންމަތީގެ އުމުރު ފުރާއެވެ.
ކޮންމެ އުމުރުފުރާއެއްގައިވެސް ބަލައިގެން ކިޔެވުމުގެ ގޮތްޕާއި ނުބަލާ ކިޔެވުމުގެ ގޮފިން ވާދަ ކުރާގޮތަށް ހަމަޖެހިފައިވާ މިމުބާރާތުގައި، ކޮންމެ ޢުމުރު ފުރާއަކުންވެސް، ކޮންމެ ގޮތްޕަކަށް ވަކިން 1 ވަނަ 2 ވަނަ އަދި 3 ވަނަ ހޮވާގޮތަށް ވަނީ ހަމަ ޖެހިފައެވެ. އަދި މީގެ އިތުރުން ދެގޮފި އެއްކޮށް ވެސް ކޮންމެ އުމުރު ފުރައަކުންވެސް ވަނަތައް ހޮވުމުގެ އިތުރުން، މުޅި މުބާރާތުގެ ދެގޮފި އެއްކޮށް، 1 ވަނަ، 2ވަނަ އަދި 3 ވަނަ ވެސް ހޮވާގޮތަށް ވަނީ ހަމަޖެހިފައެވެ. މިގޮތުން އިނާމުގެ ގޮތުގައި؛
މުޅި މުބާރާތުން 1ވަނަ އަށް ( ދެގޮފި އެއްކޮށް) – ޢުމްރާ ދަތުރު،
މުޅި މުބާރާތުން 2ވަނަ ( ދެގޮފި އެއްކޮށް) – 10،000ރ.،
މުޅި މުބާރާތުން 3ވަނަ ( ދެގޮފި އެއްކޮށް) – 7500ރ، ވަނީ ކަނޑައަޅާފައެވެ.
ވެލިދޫ ކައުންސިލުން ހާމަކޮށްފައިވާ ގޮތުގައި މިއީ، ވެލިދޫ ރައްޔިތުންގެ ހިތްތަކުގައި ކީރިތި ޤުރުއާނަށް ލޯބި ޖެއްސައި ޤުރުއާން ކިޔެވުމުގެ ފަންނު އާލާކޮށް، ދިރުވައި، ފެތުރުމަށް މަސައްކަތް ކުރުމާއި، ކީރިތި ޤުރުއާން ހިތުދަސް ކުރުމަށާއި، ތަޖުވީދު މަގަށް ޤުރުއާން ކިޔެވުމަށާއި، ކީރިތި ޤުރުއާނުގެ ޢިލްމު އުނގެނުމާއި އުނގަންނައި ދިނުމުގެ ރޮނގުން ކުރިޔަށް ދިއުމަށް މަސައްކަތް ކުރުމާއި، ޤައުމީ މުބާރާތަށ ބޭނުންވާ ބައިވެރީންގެ އާރެއް އުފެއްދުމާއި، ކީރިތި ޤުރުއާން ރީތިކޮށް ކިޔެވުމުގެ މައިދާނުގައި ވެލިދޫ ރައްޔިތުންގެ މެދުގައި ވާދަވެރިކަން އުފެއްދުމާއި، ވެލިދޫ ހުރިހާ ރައްޔިތުންނަށް ޤުރުއާން މުބާރާތުގައި ބައިވެރިވުމުގެ ފުރުޞަތުދީ، ކީރިތި ޤުރުއާނަށް ހިތްޖެއްސުން ފަދަ އެތައް މަޤްޞަދެއްގައި ކުރިއަށް ގެންދިއުމަށް ހަމަޖެހިފައިވާ މުބާރާތެކެވެ.
ކައުންސިލްގެ ރައީސް އާތިފް ޙުސެއިން މަޢުލޫމާތު ދެއްވި ގޮތުގައި، މުބާރާތުގެ ބައިވެރީންނަށް، މުބާރާތުގެ ކިޔެވުމަށް ޤުރުއާން ފަރިތަކޮށްދީ ތަމްރީނު ދިނުމުގެ އިންތިޒާމު ހަމަ ޖެއްސުމުގެ މަސައްކަތް ކައުންސިލުން ދަނީ ކުރަމުންނެވެ. މިމުބާރާތުގެ އެންމެހާ ކަންކަން އިންތިޒާމުކޮށް ހިންގުމަށް ހަމަޖެހިފައިވަނީ، ކައުންސިލުން މިަކަމަށް ނެގިފައިވާ ކޮމެޓީއަކުންނެވެ.
މުބާރާތުގައި ބައިވެރިވުމަށްއެދޭ ފޯމް ހުށައެޅުމުގެ ސުންގަނޑިއަކީ 31 މެއި 2023 ވާ ބުދަ ދުވަހުގެ 14:00އެވެ. މުބާރާތް ސްޕޮންސަރ ކުރުމާއި، މުބާރާތުގެ ވަނަތަކަށް އިނާމު ހުށަހެޅުމުގެ ފުރުސަތު މިހާރުއްސުރެ ހުޅުވާލެވިފައިވާ ކަމަށާއި، އެކަމަށް އެދިލައްވާ ފަރާތްތަކުން ކައުންސިލްގެ ހޮޓްލައިން،7897744 އަށް ގުޅުއްވައިގެން އެކަންކަން ކުރިއަށް ގެންދެވޭނެ ކަމުގައި ކައުންސިލްގެ ރައީސް އާތިފް ޙުސެއިން މަޢުލޫމާތު ދެއްވިއެވެ.
މުބާރާތުގައި ބައިވެރިވުމަށް އެދޭ ފޯމް.
މުބާރާތުގެ ޤަވަޢިދު.
