މޮނިޓަރުންނާއި އޮބްޒާވަރުންނަށް އިތުރު ފުރުސަތެއް
ސެޕްޓެމްބަރު މަހު ބާއްވާ ރިޔާސީ އިންތިޚާބުގައި އޮބްޒާވަރުންނާއި މޮނިޓަރުންނަށް ވުމަށް އެދުމުގެ މުއްދަތު އިލެކްޝަންސް ކޮމިޝަނުން އިތުރުކޮށްފިއެވެ.
އޮބްޒާވަރުންނާއި މޮނިޓަރު ކަމަށް ކުރިމަތިލުމުގެ އެންމެ ފަހުގެ ތާރީހަކަށް ކުރިން އޮތީ މިއަދުގެ މެންދުރުފަހު 3 ޖެހުމާއި ހަމައަށް، ނަމަވެސް އެ ފުރުސަތު މިހާރުވަނީ މި މަހުގެ 15 ވަނަ ދުވަހުގެ މެންދުރު 3 ޖެހުމާއި ހަމައަށް އިތުރުކޮށްފައި ކަމަށް އީސީ އިން ވިދާޅުވިއެވެ.
އޮބްޒާވަރުންނާއި މޮނިޓަރުންނަށްވުމުގެ ޝަރުތުތަކުގެ ތެރޭގައި އުމުރުން 18 އަހަރު ފުރިފައިވާ ދިވެއްސަކަށްވުމާއި ޖިނާއީ ކުށެއްގެ ހުކުމް ތަންފީޒުކުރަމުންދާ މީހެއް ކަމުގައި ނުވުން ހިމެނެއެވެ. އަދި ސިޔާސީ ޕާޓީއެއްގެ ރަޖިސްޓީއެއްގައި ހިމެނޭ މީހަކަށް ނުވުމާއި އިންތިހާބާ ބެހޭ މަސައްކަތެއް ކުރުމަށް އީސީގެ ފަރާތުން ހަވާލުވެގެން ހުރި މީހަކަށް ނުވުން ވެސް ހިމެނެއެވެ.
މީގެ އިތުރުން އީސީން ކަނޑައަޅާފައިވާ ސުލޫކީ މިންގަނޑު ކިޔައި، އަމަލުކުރަން އިގުރާރުވާ މީހަކަށް ވުމާއި ވޭތުވެދިޔަ ފަސް އަހަރު ތެރޭގައި ސުލޫކީ މިންގަނޑާ ހިލާފުވެގެން ފިޔަވަޅެއް އަރައިފައިވާ މީހަކަށް ނުވުން ވެސް ވަނީ ހިމަނާފައެވެ.
އީސީ އިން ވިދާޅވީ މޮނިޓަރުންނަށް ވެވެނީ މީޑިއާގައި މަސައްކަތްކުރާ ފަރާތްތަކަށް ކަމަށާއި އެއީ ރާއްޖޭގައި މަސައްކަތްކުރާ ނޫސް އަދި މަޖައްލާތަކުގައި މަސައްކަތްކުރާ ފަރާތްތަކާއި ބައިނަލްއަގްވާމީ މީޑިއާތަކުގައި މަސައްކަތްކުރާ ފަރާތްތަކަށް ކަމަށެވެ.
މިލިޔުން ކިޔާލުމުން
