އަޤްޞާ ޙިމާޔަތް ކުރުމަށް ދާން ބޭނުންވާ ދިވެހީންނަށް ފުރުޞަތު ދިނުމަށް ގޮވާލައިފި !

މުޙައްމަދު ތަކުރުފާނުގެ ލަޝްކަރު މިތިބީ ތައްޔާރަށް ކަމަށާއި، އަޤްޞާ ޙިމާޔަތް ކުރުމަށް ދާން ބޭނުންވާ ދިވެހީންނަށް އެފުރުޞަތު ދިނުމަށް، ފަލަސްޠީނާއި އެކު ދިވެހީން ތިބިކަން ހާމަކުރުމަށް ރޭ ބޭއްވި ހިނގާލުމުގެ ބައިވެރީންތަކެއް ބުނެފިއެވެ. ރައިޓް މޫވްމެންޓްގެ ފަރާތުން ބޭއްވި މި ހިނގާލުމުގައި އެތައް ހާސް ބަޔަކު ވަނީ ބައިވެރި ވެފައެވެ.

ރޭގެ ހިނގާލުމުގައި ޓެެރަރިސްޓް އިސްރާއީލާއި ދެކޮޅަށް އެތައް ޝުޢޫރެއް ހިމެނޭ ލިޔުންތަކާއި ބެނާތައް ވަނީ އުފުލާފައެވެ. މީގެތެރޭގައި ދިވެހީންގެ ތެރެއިން އަޤްޞާ ޙިމާޔަތް ކުރުމަށް ދާން ބޭނުންވާ ދިވެހީންނަށް އެފުރުޞަތު ދިނުމަށް ގޮވާލާފައިވާ ބެނާއާއި، މުޙައްމަދު ފާނުގެ ލަޝްކަރު މިތިބީ ތައްޔާރަށް ކަމަށް ބުނާ ބެނާއެއްވެސް ހިނގާލުމުގައި ބައިވެރީން ވަނީ އުފުލާފައެވެ. އަދި ނަޞްރު ލިބޭނީ ޖިހާދުކޮށްގެން ކަމަށް ބުނެ ހަރުއަޑުން އެތައް ޒުވާނުންނަކާއި ބައިވެރީންގެ އެތައް ބަޔަކު ވަނީ ގޮވާފައެވެ.

އިޝްތިހާރު

މިފަދަ ބެނާތަކާއި އަޑު އުފުލުންތަކުން ދިވެހީންގެ އެތައް ބަޔަކު ދޭން ބޭނުންވީ މެސެޖަކީ، ދިވެހީން މިތިބީ ހަމަ އެކަނި އަޑު އުފުލަން ނޫންކަމަށާއި، ހިތްވަރާއި ޖޯޝާއެކު، ދީނަށްޓަކައި ހަނގުރާމަކޮށް އަޤްޞާ ޙިމާޔަތްކޮށް، މުސްލިމުންގެ ދިފާޢުގައި ދީނަށް ނަޞްރު ދިނުމަށް ހަނގުރާމައަށް ދިއުމަށް ކެތް މަދުވެފައި ކަމެވެ.

އެތައް ހާސް ބަޔަކު ބައިވެރިވި މި ހިނގާލުމުގައި، އިސްރާއީލުގެ ޕާސްޕޯޓު ރާއްޖޭގައި ބޭން ކުރުމަށާއި، އިސްރާއީލު މީހުން ރާއްޖެ އައުން މަނާ ކުރުމަށް ވަނީ ގޮވާލާފައެވެ. މިހިނގާލުމުގައި ގިނަ ޢަދަދެއްގެ ކުޑަކުދީންނާއި، އަންހެންުންނާއި މުސްކުޅީން ވެސް ވަނީ ބައިވެރިވެފައެވެ. މީގެ އިތުރުން ރާއްޖޭގައި ދިރިއުޅޭ ޔޫރަޕާއި އެކި ހިސާބުތަކުގެ ބިދޭސީންވެސް ވަނީ ބައިވެރި ވެފައެވެ.

ހަމައެކަނި ހިނގާލުންތަކާއި، އިންސާނީ އެހީ ދީގެން ފަލަޞްޠީނަށް ލިބޭނެ ނަޞްރެއް ނޯންނާނެ ކަމަށާއި، ނަޞްރު ލިބޭނީ ޖިހާދުކޮށްގެން ކަމުގައި ބުނެ ހިނގާލުން ތަކާއި ސޯޝަލް މީޑިއާގައި ދިވެހީންގެ އެތައް ބަޔަކު ދަނީ އަޑު އުފުލަމުންނެވެ. އެއާއިއެކު ދިވެހީން ގެންދަނީ އެތައް ފައިސާއަކާއި އެހީތެރިކަން ފަލަސްޠީނަށް ފޯރުކޮށްދެމުންނެވެ.