އެޗްއެސްބީސީ އަށް އާ ސީއީއޯއެއް

އެޗްއެސްބީސީ ގްރޫޕްގެ ސީއީއޯގެ މަގާމުގައި ކުރިން ހުމްނެވި ނޮއެލް ކްއިން، 62، މިދިޔަ އެޕްރީލް މަހުގެ ތެރޭގައި ރިޓަޔާކުރައްވަން ނިންމެވުމާ ގުޅިގެން އާ ސީއީއޯއަކަށް އައްޔަންކޮށްފައި ވަނީ ޖޯޖް އެލްހެޑްރީ އެވެ.

އުމުރުން 50 އަހަރުގެ ޖޯޖް މިހާތަނަށް ހުންނެވީ އެޗްއެސްބީސީގެ ޗީފް ފައިނޭންޝަލް އޮފިސާ (ސީއެފްއޯ) ގެ މަގާމުގަ އެވެ. އޭނަ އެޗްއެސްބީސީ ގްރޫޕާ ގުޅިވަޑައިގަތީ 2005 ގަ އެވެ.

އިޝްތިހާރު

ޖޯޖް އާ މަގާމުގެ މަސްއޫލިއްޔަތު އަދާކުރައްވަން ފައްޓަވާނީ ސެޕްޓެމްބަރު 2 އިން ފެށިގެންނެވެ.

މިިކަމާ ގުޅިގެން އެޗްއެސްބީސީގެ ޗެއާމަން ސާ މާކް ޓަކާ ވިދާޅުވީ ޖޯޖް އަކީ ބޭންކިން ދާއިރާގެ ވަރަށް ތަޖުރިބާކާރު، ގާބިލު ބޭފުޅެއް ކަމަށާއި އޭނަގެ ސީއީއޯކަމުގެ ދަށުން ބޮޑެތޮ ކުރިއެރުންތަކެއް އަންނާނެ ކަމަށް ގަބޫލުކުރައްވާ ކަމަށެވެ.

ޖޯޖް ވިދާޅުވީ އެޗްއެސްބީގެ ބޯޑުން އޭނަ އަށް އިތުބާރުކޮށް، ސީއީއޯގެ މަގާމަށް ހަމަޖެއްސުމަކީ ލިބިވަޑައިގަތް ވަރަށް ބޮޑު ޝަރަފެއް ކަމަށެވެ.

ހެޑްކުއާޓަރު އިނގިރޭސިވިލާތުގެ ލަންޑަންގައި ހުންނަ އެޗްއެސްބީސީގެ ބްރާންޗްތައް ދުނިޔޭގެ އެކި ހިސާބުތަކުގައި ހިންގަ އެވެ. ބްރާންޗްތަކުގެ އަދަދު 2،580 އަށް އަރާ އިރު، ކުންފުނީގެ މުވައްޒަފުންގެ އަދަދު 221،000 އަށް ވުރެ ގިނަ އެވެ.