އުރީދޫ ލޮކޭޓް ސެޓަލައިޓް ތަޢާރަފްކޮށްފި

މަސްދޯންޏާއި އެހެނިހެން އުޅަނދުފަހަރު އުޅޭ ހިސާބު ފަސޭހާއިން ބަލާލެވޭ އުރީދޫ ލޮކޭޓް ސެޓަލައިޓް ތަޢާރަފްކޮށްފިއެވެ.

މަސްވެރިންގެ ދުވަހުގެ މުނާސަބަތުގައި ތަޢާރަފްކުރި އުރީދޫ ލޮކޭޓް ސެޓަލައިޓާއެކު ރާއްޖެ އާއި ރާއްޖޭންބޭރުގެ ކަނޑުތަކުގައި ދަތުރު ކުރަމުންދާ އުޅަނދުފަހަރު އުޅޭ ސަރަހައްދު ފަސޭހަކަމާއި އެކު ބަލާލެވޭ ވެބް ޕޯޓަލް އަކާއި މޮބައިލް އެޕްލިކޭޝަނެއްވެސް މި ޑިވައިސް އާއި އެކު ފޯރުކޮށްދެވޭނެއެވެ.

އިޝްތިހާރު

ދުނިޔޭގެ ފެންވަރުގައި މަސްވެރިކަމަށް ބޭނުންކުރަމުންދާ އުޅަނދުފަހަރު މޮނީޓަރކޮށް މެނޭޖްކުރުމުގައި ވެސެލް ޓްރެކް ކުރާ ޑިވައިސްތައް ދަނީ މުހިންމު ދައުރެއް އަދާކުރަމުންނެވެ. ޚާއްޞަގޮތެއްގައި ސެލިއުލަރ ނުވަތަ ރޭޑިއޯ ސިގްނަލް ނުލިބޭ ސަރަހައްދުތަކުގައި އޮޑިދޯނިފަހަރާއި ފަޅުވެރިން އެއްގަމާއި ގުޅުވާލަދެނީ ސެޓަލައިޓް މެދުވެރިކޮށެވެ.

ހަމައެއާއި އެކު އުރީދޫ ލޮކޭޓް ސެޓަލައިޓް މެދުވެރިކޮށް އިންޖީނުގެ ހާލަތާއި އުޅަނދުފަހަރުގައި ބޭނުން ކުރަމުންދާ ތެލުގެ މަޢުލޫމާތާއި ދަތުރު ކުރަމުންދާ ރޫޓްތަކާއި ބެހޭ މަޢުލޫމާތާއި ކަނޑައެޅެފައިވާ ވަކި ސަރަހައްދަކުން އުޅަނދުފަހަރު ބޭރުވެއްޖެނަމަ އަންގައިދޭ ޖިއޯފެންސިންގެ އެލަރޓްގެ ޚިދުމަތްވެސް ލިބޭނެއެވެ.

މި ޚިދުމަތް ތަޢާރަފް ކުރުމަށްފަހު އެ ކުންފުނީގެ ސީއީއޯ ވިކްރަމަ ސިންގހަ ވިދާޅުވީ ރާއްޖޭގެ މަސްވެރިކަމުގެ ދާއިރާ އާއި އޮންނަ ގާތް ގުޅުމަކީ އުރީދޫ އިން ފަޚުރުވެރިވާ ކަމެއް ކަމަށެވެ. އަދި މުސްތަޤްބަލުގައިވެސް މަސައްކަތްކުރަމުންދާނީ އުރީދޫގެ ޓެކްނޮލޮޖީތަކާއި ޚިދުމަތްތައް މެދުވެރިކޮށް މިދާއިރާއަށް ފުރިހަމަ އެއްބާރުލުން ދިނުމަށް ކަމަށެވެ.

މީގެ އިތުރުން މި ޑިވައިސް ބޭނުންކުރައްވާ ފަރާތްތަކަށް އޮޑިދޯނިފަހަރު ދަތުރުކުރަމުންދާ ސަރަހައްދު ޓްރެކްކޮށް، ފަޅުވެރިންނާއި މުދަލުގެ ރައްކާތެރިކަން އިތުރުކޮށްދިނުން ފަދަ މުހިންމު ފައިދާތައް ލިބޭނެކަމަށްވެސް އޭނާ ވިދާޅުވިއެވެ.

އުރީދޫ ލޮކޭޓް ސެޓަލައިޓް ފޯރުކޮށްދެވެނީ ވެސެލް ޓްރެކްކުރުމުގައި ކަސްޓަމަރުންގެ ތަފާތު ބޭނުންތަކަށް ފަރުމާކުރެވިފައިވާ ތިން ޕެކޭޖާއި އެކުއެވެ. މީގެތެރޭގައި އުރީދޫ ލޮކޭޓް ސެޓެލައިޓް 599، އުރީދޫ ލޮކޭޓް ސެޓެލައިޓް 799 އަދި އުރީދޫ ލޮކޭޓް ސެޓެލައިޓް 1199 ހިމެނެއެވެ.

އުރީދޫ ލޮކޭޓް ސެޓެލައިޓް ޕްރީ-އޯޑަރ ކުރެވޭނީ އުރީދޫ އެކްސްޕީރިއަންސް ސެންޓަރުން ކަމަށާއި އިތުރު މަޢުލޫމާތު ހޯދުމަށް އެ ކުންފުނީގެ 929 ނަމްބަރ ފޯނަށް ގުޅުއްވުމަށް އުރީދޫއިން އެދެއެވެ.