ބައިޕާސް އާއި ނިއު އެލާރޓް މެޗުގައި ހަމަހަމަ ނަތީޖާއެއް…
ކ. ގުރައިދޫގައި މިހާރު ކުރިއަށްދާ ތުއްތޮންބެ ކަޕް ފުޓްބޯޅަ މުބާރާތުގައި މިއަދު ހަވީރު ކުޅުނު މެޗު ދެޓީމު އެއްވަރުވެގެން ނިމިއްޖެއެވެ.
ބައިޕާސް އާއި ނިއު އެލާރޓް ބައްދަލު ކުރި މި މެޗުގެ ފުރަތަމަ ހާފުގައި ލަނޑުޖަހާ ލީޑު ނެގީ ބައިޕާސް ޓީމުންނެވެ. އަދި މުޅި މެޗަށް ބަލާ އިރު، ގިނަ އިރު ބޯޅަ ހިފަހައްޓައިގެން މެޗު ޑޮމިނޭޓް ކޮށްފައިވަނީވެސް އެޓީމުންނެވެ.
އެހެންނަމަވެސް ނިއު އެލާރޓުންވެސް ވަނީ ބައިޕާސްގެ ގޯލަށް ނުރައްކާތެރި ޙަމަލާތަކެއް ފޮނުވާލާފައެވެ. އެ ޙަމަލާތަކުގެ ހުރަހަކަށްވީ ބައިޕާސް ޓީމުގެ ގޯލްކީޕަރެވެ.
ފުރަތަމަ ހާފުގައި ބައިޕާސް ޓީމުން ޖެހި ލަނޑާއެކު މެޗު ނިމެންދަނިކޮށް ފަހުހާފުގެ އިތުރުވަގުތުގެވެސް އެންމެ ފަހު މިނެޓުގައި ނިއު އެލާރޓުން ނަތީޖާ ހަމަހަމަކުރީ ލިބުނު ޕެނަލްޓީއަކުންނެވެ.
ރައްޔިތުންގެ މަޖިލީހުގެ ގުރައިދޫ ދާއިރާގެ މެމްބަރު އަލްއުސްތާޛު އިބްރާހިމް ރިޒާގެ މޭސްތިރިކަމުގައި ބާއްވާ މި މުބާރާތުގެ މިއަދުގެ މެޗު ޝަރަފްވެރިކޮށްދެއްވީވެސް އަލްއުސްތާޛު އިބްރާހިމް ރިޒާއެވެ.
ޖުމްލަ 6 ޓީމެއް ބައިވެރިވެފައިވާ މި މުބާރާތުގެ ފައިނަލް މެޗު ކުޅުމަށް ތާވަލުކޮށްފައިވަނީ އަންނަ ޖެނުއަރީ މަހުގެ 6 ވަނަ ދުވަހުއެވެ. މިއަހަރުގެ މުބާރާތުގެ ޗެމްޕިއަން ޓީމަށް =/10000 ރުފިޔާ ދިނުމަށް ވަނީ ނިންމާފައެވެ.
މި މުބާރާތުގައި މާދަމާ ހަވީރު ބައްދަލު ކުރާނީ ޗެލެންޖަރސް އާއި ޔޫތް ޔުނައިޓެޑެވެ.
މިލިޔުން ކިޔާލުމުން
