އިމާމުންނާއި ޚަޠީބުން ތަމްރީން ކުރުމުގެ ޕްރޮގްރާމެއް ފަށައިފި

އިމާމުންނާއި ޚަޠީބުން ތަމްރީން ކުރުމަށް އިސްލާމިކް މިނިސްޓްރީއިން ކުރަމުންދާ މަސައްކަތުގެ ދަށުން އިމާމުންނަށް އިތުރު ތަމްރީން ދިނުމުގެ ޕްރޮގްރާމެއް ފަށައިފިއެވެ.

އިމާމުން ތަމްރީން ކުރުމުގެ މި މަސައްކަތުގެ ދަށުން މިއަދު ފެށިގެން މިދިޔައީ މާލޭގެ އިމާމުންނަށް ޚާއްސަ ތަމްރީން ޕްރޮގްރާމެކެވެ. މި ޕްރޮގްރާމް ފައްޓަވައިދެއްވީ މިއަދު އިސްލާމީ މަރުކަޒުގައި މިކަމަށްޓަކާ ބޭއްވުނު ބައްދަލުވުމެއްގައި މިނިސްޓަރ ޑރ. ޒިޔާދެވެ.

އިޝްތިހާރު

މި ޕްރޮގްރާމް ފައްޓަވައިދެއްވުމުގެ ގޮތުން މިނިސްޓަރ ދެއްކެވި ވާހަކަފުޅުގައި ކޮންމެ ދާއިރާއެއްގައި މަސައްކަތް ކުރި ކަމުގައި ވީ ނަމަވެސް، ނަފްސަށް ބޭނުންވާ ޢިލްމީ ކުރިއެރުން ބޭނުން ނުވާނޭ ދާއިރާއެއް އޮވެގެން ނުވާނެ ކަމުގައި ވިދާޅުވިއެވެ. އަދި މި ޢިލްމު ހޯދުމަށް ވަކި ޢުމުރެއް ވަކި ތަނެއް ވަކި ވަގުތެއް ކަނޑައެޅިފައި އޮވެގެން ނުވާނެ ކަމުގައްޔާއި، ވަކި ވަރަކަށް ޢިލްމު އުނގެނުމުން ތިމާއަށް މިހިރީ ހުރިހާ މޮޅެއް ހޯދިފައި ކަމުގައި ދެކުމަކީ ބޮޑާކަން ކަމުގައި ފާހަގަކުރެއްވިއެވެ. މިއީ ނުރައްކާތެރި ސިފައެއް ކަމަށާއި، މި ސިފައިން ރައްކާތެރިވެ ސަލާމަތްވެ ތިބުމަށް މެދުކެނޑުމެއް ނެތި ޢިލްމު ހޯދައި ރިވެތި ސިފަތައް ދަސްކޮށް އެސިފަތައް އެހެން މީހުންނަށް ކިޔައިދެވޭހާ ހިތްތިރި މީހަކަށް ތިމާ ވެވޭތޯ އަބަދުވެސް މަސައްކަތް ކުރުމަށް މިނިސްޓަރ ނަސޭހަތްތެރިވެވަޑައިގަތެވެ. އަދި ޢިލްމު ހޯދުމަށް ސަޙާބީންގެ ޒަމާނުގައި އިލްމުވެރިން ކުރެއްވި ބުރަ މަސައްތަކާއި، ކުރީ ޒަމާންތަކުގައި ދިވެހިންގެ ތެރޭގައި އުފެދުނު ޢިލްމްވެރިން އެ ޢިލްމު ހޯދުމަށް ޢަރަބި ކަރައަށް އުނދަގޫ ދަތުރުތަކެއް ކުރަން ޖެހުނު ކަމާއި އަދި މި ނޫނަސް، އެ ޒަމާނުގެ ކަންކަން ހުރި ގޮތުން އެތައް ގޮންޖެހުންތަކާއި ކުރިމަތި ލާން ޖެހެނު ކަމަށް ފާހަގަކުރެއްވި އެވެ. މިހާރުގެ ވަސީލަތްތަކުގެ ކުރިއަރައިފައިވާ މި ޒަމާނުގައި ޢިލްމް ހޯދުމަކީ މާ ބޮޑަށް ވެސް ފަސޭހަ ކަމަކަށް ވެފައި ވާ އިރު މި ޢިލްމް ހޯދައި ނަފްސު ކުރިއަރުވަން މަސައްކަތް ކުރަން ކަންނެތް ވުމަކީ ނުކުޅެދުންތެރިކަމެއް ކަމުގައި މިނިސްޓަރ ފާހަގަކުރެއްވިއެވެ.

“ކުރީ ޒަމާންތަކުގައި ޢިލްމް ހޯދުމަކީ ކުރަން ޖެހޭ ބޮޑު ހަނގުރާމައެއް. މި ޒަމާން ހެނެއް ނޫން. މިއަދު، ޢިލްމް ހޯދުމަކީ މާ ބޮޑު ކަމެއް ނޫން. މިއަދު އެ ވަސީލަތްތައް ﷲ ގެ އިރާދަފުޅުން މިވަނީ ތަނަވަސްވެފައި. މި ފަސޭހަކަން ލިބިފައިވާ އިރު ވެސް ޢިލްމް ހޯދައި، ޢިލްމީ ގޮތުން ނަފްސު ކުރިއަރުވަން މަސައްކަތް ނުކޮށް ކަންނެތް ވެފައި ތިބުމަކީ ނުކުޅެދުންތެރިކަމެއް” ، މިނިސްޓަރ ވިދާޅުވިއެވެ.

މިނިސްޓަރ ގެ ވާހަކަފުޅުގައި އިމާމުންނަކީ ޤަދަރުވެރި މާތް މަސައްކަތްތަކެއް ކުރައްވާ ބައެއް ކަމަށް ފާހަގަކުރެއްވިއެވެ. އަދި މިހާރު މިއީ ބަދަލު ވެފައިވާ ޒަމާނެއް ކަމުން މި ދާއިރާގައި ކުރިމަތިވާ ގޮންޖެހުންތައް މިއަދު ތަފާތު ވާނޭ ކަމަށާއި، އެގޮންޖެހުންތަކުން އަރައިގަތުމަށް ދީނީ ތައުލީމަކީ މުހިންމު ބައެއް ކަމަށް ވާތީ އެ ތަޢުލީމް ހަރުދަނާކޮށް އިމާމުންނަށް ބޭނުން ވާނެ ޢިލްމީ މަޢުލޫމާތު މެދުނުކެނޑި ފޯރުކޮށްދެވޭނެ ނިޒާމެއްގެ ދަށުން މި ތަމްރީން ޕްރޮގްރާމްތައް ހިންގުމަކީ މިނިސްޓަރގެ ވިސްނުންފުޅު ކަމުގައި ވިދާޅުވިއެވެ. އަދި އިމާމުންނަކީ އެއްވެސް އަގެއް ނެތް ބައެއް ބައެއް ކަމުގައި ހެދުމަށް ބަޔަކު މީހުން މީޑިއާގެ ވަސީލަތްތައް ބޭނުން ކޮށް ގެން ރައްޔިތުންނަށް ވިސްނުވައި ދިނުމަށް ކުރާ މަސައްކަތާއި ދެކޮޅަށް މިސަރުކާރުން އަބަދުވެސް މަސައްކަތް ކުރައްވާނެ ކަމުގައި ވިދާޅުވިއެވެ. އަދި މިސަރުކާރުން މިވަނީ އިމާމުން ކުރިއަރުވައި ޤަދަރުވެރި ކުރުމަށް އިމާމުންގެ އަތުގައި ހިފައިފައި ކަމުގައި ވެސް ހިނިތުންވުމަކާއި މިނިސްޓަރ އެކު ފާހަގަކުރެއްވިއެވެ.

މިބައްދަލުވުމުގައި މިނިސްޓްރީގެ ނާއިބު އަލްފާޟިލް މުހައްމަދު މުސްޠަފާ އިބްރާހީމްވެސް ވާހަކަފުޅު ދެއްކެވިއެވެ. މުސްޠަފާގެ ވާހަކަފުޅުގައި، މިކޯހުގައި ކިޔަވައިދެއްވާ މައުލޫމާތާއި ދަސްކޮށްދޭން މަސައްކަތް ކުރާ ހުނަރު  ދަސްކުރާ ހިތުން ތިބެގެން ދަސްކުރުމަށް އިލްތިމާސް ކުރައްވާފައިވެއެވެ. އަދި ޕްރޮގްރާމްގައި ބައިވެރިވާ ހުރިހާ އިމާމުންވެސް އެކަކު އަނެކަކުގެ ތަޖުރިބާ ޙިއްސާކޮށް އެކުވެރިކަމުގެ ތެރެއިން އެތަޖުރިބާތަކުން ކަންކަން ދަސްކުރުމަށް ނަސޭހަތްދެއްވިއެވެ.

މިނިސްޓަރ އާއި މިނިސްޓަރގެ ނާއިބަށް ފަހު ދެން މި ބައްދަލުވުމުގައި ވާހަކަ ދެއްކެވީ އިމާމުންގެ ނާއިބު އަލްއުސްތާޛް އަބްދުލް ޖަލީލް އިސްމާޢީލެވެ. އުސްތާޛް ޖަލީލް ބޮޑަށް ބެއްލެވީ ޕްރޮގްރާމް ރޭވިފައިވާ ގޮތް ޕްރޮގްރާމްގެ ބައިވެރިންނަށް ކިޔައިދެއްވުމަށެވެ. އެގޮތުން ޕްރޮގްރާމް ބާއްވަ ގަޑިތަކާއި ދުވަސްތަކާއި ރޭވިފައިވާ ގޮތް ކިޔައިދެއްވިއެވެ.

މި ޕްރޮގްރާމަކީ މާލޭ ސަރަޙައްދުގެ އިމާމުންނަށް ޚާއްސަ ކުރެވިގެން ކުރިއަށް ގެންދެވޭ ތަމްރީން ޕްރޮގްރާމެކެވެ. 3 މަސް ދުވަހަށް މި ޕްރޮގްރާމް ކުރިއަށް ގެންދަން ވަނީ ހަމަޖެހިފައެވެ. މި ޕްރޮގްރާމް ބޮޑަށް އަމާޒުވަނީ މަސައްކަތަށް ބޭނުންވާ ޢަމަލީ ހުނަރުތައް ދަސްކޮށްދިނުމަށެވެ.

އިމާމުން ތަމްރީން ކުރުމުގެ ފުރަތަމަ ޕްރޮގްރާމް ބާއްވައިފައި ވަނީ ނިމިދިޔަ ނޮވެމްބަރު މަހުގެ ތެރޭގައި މާލޭ ސިޓީގެ އިމާމުންނަށް ޚާއްސަކޮށްގެންނެވެ. އެއީ ދެ ދުވަހުގެ މުއްދަތަށް ކުރިއަށް ގެންދެވުނު ޕްރޮގްރާމެކެވެ. 80 އިމާމުން ބައިވެރިވި އެ ޕްރޮގްރާމްގައި ފާހަގަކުރެވުނު އިމާމުންނަށް ޚާއްސަކޮށްގެން މިއަދު މި ފެށުނު 3 މަސް ދުވަހުގެ ޕްރޮގްރާމްގައި ބައިވެރިވަނީ 36 އިމާމުންނެވެ. މި ޕްރޮގްރާމްގެ ސެޝަންތައް ކުރިއަށް ގެންދަނީ މުޅިން ވެސް މިސްކިތްތަކުގައެވެ.

އިމާމުން ތަމްރީން ކުރުމުގެ ޕްރޮގްރާމް ގެ ދެވަނަ ޕްރޮގްރާމް މި ޑިސެމްބަރ މަހުގެ ތެރޭގައި އައްޑޫ ސިޓީގައި ވަނީ ކުރިއަށް ގެންގޮސްފައެވެ. މި ޕްރޮގްރާމްގައި އައްޑޫ ސިޓީގެ ހުރިހާ އިމާމުންގެ ފެންވަރު ބެލި، އިމާމުންގެ ޢިލްމާއި ހުނަރު ތަރައްޤީ ކުރުމަށް ތަމްރީން ޕްރޮގްރާމްތައް ވަނީ ކުރިއަށް ގެންގޮސްފައެވެ. ހަމަ މިއާއެކު، ފުވައްމުލަކުގެ އިމާމުން ތަމްރީން ކުރުމުގެ ޕްރޮގްރާމް ފެށުމަށް މިނިސްޓްރީގެ ޓީމެއް އަވަސް މުސްތަޤްބަލެއްގައި ފުވައްމުލަކަށް ފުރުމަށް ވަނީ ނިންމާފައެވެ.