އުރީދޫ ކަލަރ ރަންގައި ރެޖިސްޓްރީވުމަށް ހުޅުވާލައިފި

ސިއްހަތަށް ފައިދާހުރި އަދި މަޖާ ހަރަކާތެއްގެ ގޮތުގައި ދުވުން ޕްރޮމޯޓުކޮށްދޭ، އުރީދޫ ކަލަރ ރަން 2018 އަށް ރަޖިސްޓްރޭޝަން މިއަދު ފަށައިފިއެވެ.

ތަފާތު ކުލަތަކާއި އެކު، އުފާވެރި މާޙައުލެއްގައި ބާއްވާ އުރީދޫގެ މަޤްބޫލު ދުވުން މި އަހަރު އިތުރަށް ފޯރިގަދަ ކުރުމަށްޓަކައި، ނޮވެމްބަރ 23 ވަނަ ދުވަހަށް ވަނީ ކައިޓް ފެސްޓިވަލް އަކާއި ފޯރިގަދަ މިއުޒިކް ޝޯ އެއްވެސް ބޭއްވުމަށް އިންތިޒާމް ކޮށްފައެވެ.

އިޝްތިހާރު

ރީތި ޑިސްޕްލޭތަކާއިފޯރިގަދަ މަޑި އެރުވުމުގެ މުބާރާތެއް ހިމެނޭ މި ފެސްޓިވަލްއަކީ ކުޑަކުދިންނާއި ބޮޑެތިމީހުންނަށްވެސް ވަރަށް ކަމުދާނެ ހަރަކާތަކަށް ވާއިރު، މި ފެސްޓިވަލް ބޭއްވިގެންދާނީ ކަލަރ ރަންގެ ކުރިން އެ ދުވަހުގެ ހެނދުނު ހުޅުމާލޭގައެވެ. އަދި ރަން ނިމުމަށްފަހު، ރޭގަނޑު 8.00 ކުން ފެށިގެން ތަފާތު އެތައް ހަރަކާތެއް ކުރިއަށް ގެންދިއުމަށް ވަނީ ނިންމާފައެވެ.

ތަފާތު ހަރަކާތްތަކެއް ހިމެނޭ 5 ކިލޯމީޓަރުގެ މި ކުރު ދުވުމަކީ އަލަށް ދުވާ ފަރާތްތަކާއި ޢާންމުކޮށް ދުވާ ފަރާތްތަކަށްވެސް ބައިވެރިވުމަށް މަޖާވާނެ އިވެންޓެކެވެ. އުރީދޫ ކަލަރ ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ކުލަ ސްޓޭޝަންތަކުން، ކުލަގަދަ ގޮތެއްގައި އެކަން ފާހަގަ ކުރާނެއެވެ. މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ، ހިނގާފަ، ޖޮގްކޮށްފަ، ދުވެފަ ނޫނީ ނަށަމުންވެސް މި ދުވުން ނިންމިދާނެއެވެ.

މި ދުވުމުގައި ބައިވެރިވާން އެދޭ ފަރާތްތަކުން  http://ore.do/colorrunމެދުވެރިކޮށް ފަސޭހަކަމާއި އެކު ރެޖިސްޓަރކޮށް، އެބޭފުޅުން ބޭނުންވާ ކަލަރ ރަން ކިޓެއް ޚިޔާރުކުރެވޭނެއެވެ. މީގެތެރޭގައި ބިބް، ޓީޝާޓް، އަދި ފިނިޝާޒް މެޑަލް ހިމެނޭ 50 ރ. ގެ ސްޓޭންޑަޑް ކިޓް، ބިބް، ޓީޝާޓް، ފިނިޝާޒް މެޑަލް، އަތުގައި އަޅާ ބޭންޑް، ޖިމްސެކް، އަދި ކަރުދާސް ކެޕް ހިމެނޭ 200 ރ. ގެ ސްޓޭންޑަޑް ކިޓް ހިމެނެއެވެ.

ރަޖިސްޓަރ ކުރެއްވި ދުވުންތެރިންގެ ކިޓް ހަވާލުކުރެވިގެންދާނީ، ނޮވެމްބަރ 15 އަދި 16 ވަނަ ދުވަހު ބާއްވާ އުރީދޫ ކަލަރ ރަން އެކްސްޕޯގައެވެ. އެކްސްޕޯގެ ބައިވެރިންނަށް، ކަލަރ ރަންގެ ޕާޓްނަރުންނާއި ގުޅިގެން ވަރަށް ޚާއްޞަ ހަރަކާތްތަކެއްވެސް ހިންގުމަށްވަނީ ނިންމާފައެވެ..

އުރީދޫ ކަލަރ ރަން އާއި ބެހޭ އިތުރު މަޢުލޫމާތު http://ore.do/colorrun އަށް ޒިޔާރަތް ކުރެއްވުމުން ލިބިވަޑައިގަންނަވާނެއެވެ.

އުރީދޫ މޯލްޑިވްސްގެ ޑައިރެކްޓަރ އޮފް ސޭލްސް އެންޑް ބްރޭންޑް، ހުސެން ނިޔާޒް ވިދާޅުވީ އުރީދޫ ކަލަރ ރަން ފެށިގެންދިޔައީ ދުޅަހެޔޮ ދިރިއުޅުމެއް ހޯދުމުގައި ދުވުމުގެ ފައިދާ އަންގައިދިނުމުގެ އަމާޒާއެކު ކަމަށެވެ. އަދި މި އަހަރު ކަލަރ ރަން ވެގެންދާނީ މުޅި ދުވަހު ކުރިއަށްދާ، އުފާވެރި ފެސްޓިވަލަކަށް ކަމަށެވެ.

“ މިއަދު އަޅުގަނޑުމެން ކަލަރ ރަންއަށް ރަޖިސްޓަރ ކުރަން ހުޅުވާލައި، ރާއްޖޭގެ ތަޖުރިބާކާރު ދުވުންތެރިންނާއި ދުވުމަށް ޝައުގުވެރިވާ ބޭފުޅުން، އަދި އާއިލާ އާއި ރައްޓެހިންނާއި އެކު އުފާވެރި ވަގުތުކޮޅެއް ހޭދަކޮށްލަން ބޭނުންވާ އެންމެހާ ބޭފުޅުންނަށް ވެސް، އުރީދޫ ކަލަރރަން ގައި ބައިވެރިވުމަށް ދައުވަތު އަރުވަން.“ ނިޔާޒު ވިދާޅުވިއެވެ.