ދަނޑު އަޅަން ރައްތަށް ކަނޑައެޅީ މިނިވަން ޗެމްޕިއަންޝިޕުންގެ ނަތީޖާއަށް ބެލުމަށް ފަހު: އެފްއޭއެމް

ދުނިޔޭގެ ފުޓްބޯޅައިގެ މައި އިދާރާ ފީފާގެ އެހީތެރިކަމާއި އެކު ވިނަ ދަނޑު އަޅަން އިއުލާންކުރި 18 ރަށް ކަނޑައަޅާފައި ވަނީ ނިމިގެން ދިޔަ ދެ އަހަރުގެ މިނިވަން ޗެމްޕިއަންޝިޕުން އެންމެ ރަނގަޅު ނަތީޖާ ހޯދާފައިވާ ރައްތަކަށް ބެލުމަށް ފަހުގައި ކަމަށް ރާއްޖޭގެ ފުޓްބޯޅައި މައި އިދާރާ އެފްއޭއެމުން ބުނެފި އެވެ.

އެފްއޭމެއުން ކުރި އިއުލާނުގައި 16 ރަށް ހިމެނޭ އިރު މީގެ ތެރެއިން 16 ޓީމަކީ މިދިޔަ އަހަރާއި މި އަހަރުގެ މިނިވަން ޗެމްޕިއަންޝިޕުގެ ޒޯން ޗެމްޕިއަންކަން ހޯދައި ފައިނަލް ބުރަށް ހޮވުނު ޓީމުތަށް ކަމަށް އެފްއޭއެމުން ބުނެއެވެ.

އިޝްތިހާރު

އެފްއޭއެމުން އިއުލާންކުރި 16 ރަށަކީ ހދ ކުޅުދުއްފުށި، ހއ. މުރައިދޫ، ށ. މިލަންދޫ، ށ. ފޯކައިދޫ، ބ. އޭދަފުށި، ބ. ފެހެންދޫ، އއ. މާޅޮސް، އދ. ފެންފުށި، ދ. ކުޑަހުވަދޫ، ފ ނިލަންދޫ، ގދ. ތިނަދޫ، ގދ. ހޯނޑެއްދޫ، ތ. ތިމަރަފުށި، ހއ. ދިއްދޫ، ސ. ފޭދޫ، ސ. ހިތަދޫ، ޏ. ފޯއްމުލަށް އަދި ރ. އަލިފުށްޓެވެ.

އެފްއޭއެމުން ރާވާފައިވަނީ ކޮންމެ އަހަރަކު ވެސް މިނިވަން ޗެމްޕިއަންޝިޕުގެ ނަތީޖާ އަށް ބަލައިގެން ދަނޑުތައް އަޅަމުންގެންދާން ކަމަށާއި އެއް ޓީމަކުން ޒޯން ޗެމްޕިއަންކަން ހޯދައިފި ނަމަ އެ ފުރުސަތު ލިބޭނީ ދެ ވަނަ ޓީމަށް ކަމަށް އެފްއޭއެމުން ބުނެފައި ވެއެވެ.

ގައުމީ ޓީމާއި އެކު ސާފް ޗެމްޕިއަންޝިޕް ކާމިޔާބުކުރި ކެޕްޓަން އައްސަދު އަބްދުލްގަނީ އާއި އަކްރަމް އަބްދުލްގަނީ ނިސްބަތްވާ ނ. އަތޮޅުގެ ރަށެއް ލިސްޓުގައި ނެތުމުން އެ އަތޮޅުގެ ގިނަބަޔަކު ޝަކުވާކުރަމުންގެންދާއިރު އެ އަތޮޅު ޓީމެއް އެ ޒޯނުގެ ޗެމްޕިއަންކަން ހޯދާފައެއް ނުވެ އެވެ. އަދި ރާއްޖޭގެ އެންމެ ބޮޑެތި އަތޮޅުތަކުގެ ތެރޭގައި ހިމެނޭ ލ. އަތޮޅުގެ ރަށެއްވެސް މި ޕްރޮޖެކްޓް ތެރޭގައި ހިމެނިފައިނުވާއިރު، ލ. އަތޮޅު ޓީމެއްވެސް ޒޯން ޗެމްޕިއަންކަން ހޯދާފައި ނުވާކަން ފާހަގަކޮށްލެވެއެވެ. އެހެން ނަމަވެސް ލ. އަތޮޅަށް ނިސްބަތް ވާ ކުޅުންތެރިންތަކެއް އެންމެ ފަހުން ސާފް ޗެމްޕިއަން ކަން ހޯދި ރާއްޖޭގެ ގައުމީޓިމުގައި ހިމެނޭކަން ފާހަގަކޮށްލެވެއެވެ.

މިކަމާއި ގުޅިގެން އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ ޒޯން ޗެމްޕިއަންކަން ހޯދާފައި ނުވާ އަތޮޅުތަށް މިފަހަރުގެ މި ޕްރޮޖެކްޓުގައި ނުހިމެނޭ ކަމަށާއި މި ފުރުޞަތު މިފަހަރު ދީފައިވާނީ މިނިވަން ޗެމްޕިއަންޝިޕުގެ ޒޯންތަކުގެ ޗެމްޕިއަންކަން ހޯދާފައިވާ  އަތޮޅުގެ ރައްތަކަށް ކަމަށެވެ.

ޖަވާޒް ވިދާޅުވީ ވިނަ ދަނޑުތަކަކީ އެ ޓީމުތަކުން މިނިވަން ޗެމްޕިއަންޝިޕުގެ ޒޯންތަކުގެ ޗެމްޕިއަންކަން ހޯދުމުން ދޭ އިނާމެއް ކަމަށާއި  ދަނޑުތައް އަޅަނީ ރާއްޖޭގެ ލީގު ސިސްޓަމް ހޯމް އެންޑް އަވޭ އުސޫލުން ބަދަލުކުރަން އެފްއޭއެމުން ގެންއުޅޭ އަމާޒަށް ވާސިލްވުމަށް ކަމަށާއި އެހެންވެ ދަނޑުތައް އަޅާ ރަށްތައް ކަނޑައަޅާއިރު މިނިވަން ޗެމްޕިއަންޝިޕުގެ ނަތީޖާއަށް ބަލަން ޖެހޭ ކަމަށެވެ.

މީގެ އިތުރުން ޖަވާޒް ވިދާޅުވީ މިއަހަރު ދަނޑުތަށް އަޅާފައި ނިންމާލަނީކީ ނޫންކަމަށާއި އަންނަ އަހަރުވެސް ދަނޑުތަށް އަޅާނެކަމަށެވެ. އެފްއޭއެމްގެ އަމާޒަކީ ހުރިހާ ރަށެއްގައިވެސް ދަނޑުތަށް އަޅާ ހަމަކުރުން ކަމަށާއި ނަމަވެސް އިސްކަންދޭ ތަރުތީބަކީ މިނިވަން ޗެމްޕިއަންޝިޕުގެ ނަތީޖާ ކަމަށްވެސް ޖަވާޒް ވިދާޅުވިއެވެ. އަދި ދަނޑުތައް އަޅާނެ ބިންތަކުގެ ލިޔެކިޔުންތައް ކުޅިވަރާ ބެހޭ މިނިސްޓްރީން ހަމަޖެހުނުހާ އަވަހަށް މަސައްކަތް ފެށޭނެ ކަމަށްވެސް އޭނާ ވިދާޅުވިއެވެ.