ތިލަފުށީ ބޭރުގައި އޮތް ބާޖެއްގައި އަލިފާން ރޯވެއްޖެ
މާލެ އަތޮޅު ތިލަފުށީ ބޭރުގައި އޮތް ބާޖެއްގައި އަލިފާން ރޯވެގެން އެމްއެންޑީއެފް ފަޔަރ އެންޑް ރެސްކިއު ޓީމުން ހަރަކާތްތެރިވާން ފަށައިފިއެވެ.
އެ އިދާރާއިން ބުނީ އަލިފާން ރޯވިކަމުގެ ޚަބަރު ލިބުނީ މިއަދު ހެނދުނު 07:53 އެހާކަންހާއިރު ކަމަށެވެ. އަދި އަލިފާން ރޯވެފައިވަނީ ’ސަން ޓޫނާ‘ ނަމަކަށް ކިޔާ ބާޖެއްގައި ކަމަށެވެ.
މި ބާޖަކީ ކަންނެލި މަސްވެރިކަންކުރާ ދޯނިތަކުން މަސްކިރުވުމަށާއި އައިސް ދޫކުރާ ބާޖެއް ކަމަށާއި އަލިފާނުގެ ހާދިޘާ ހިނގި އިރު، އެ ބާޖުގައި 20 މީހުން ތިބިކަމަށާއި އެ އެންމެންވެސް ޕޮލިސް ލޯންޗަކަށް ނަގާފައިވާ ކަމަށްވެސް އެ އިދާރާއިން ބުންޏެވެ.
އެމްއެންޑީއެފް އިން ބުނީ އަލިފާންގަނޑު ކޮންޓްރޯލު ކުރުމަށް އެ ސަރަޙައްދުގައި ހަރަކާތްތެރިވަމުން އަންނަ ކަމަށާއި ނަމަވެސް އަދިވެސް އަލިފާންގަނޑު ކޮންޓްރޯލު ނުވާކަމަށެވެ. އަދި އެބާޖުގައި ’އެމޯނިއާ ގޭސް‘ ގިނަ ޢަދަދަކަށް ހުރިކަމުގެ މަޢުލޫމާތުވެސް ލިބިފައިވާ ކަމަށްވެސް ބުންޏެވެ.
އެ އިދާރާއިން ބުނީ އަލިފާންގަނޑުގެ 80 އިންސައްތަ ކޮންޓްރޯލު ކުރެވިފައިވާ ކަމަށާއި އަލިފާންގަނޑު ކޮންޓްރޯލު ކުރުމަށް ދަތިވެ، ގިނަ ވަގުތު ނަގަނީ އެމީނިއޯ ގޭސް ހުރުމުން ކަމަށެވެ.
މިލިޔުން ކިޔާލުމުން
