ގޮމަ އާއި ފަތްމިނީގެ ކުރިމަތިލުން ގޮމަ ކާމިޔާބުކޮށްފި

ރ. މީދޫގައި މިހާރު ކުރިއަށްދާ އެރަށު ރަތްދަޅަގޭ އަލްމަރްހޫމާ ޞަފިއްޔާ މުޙައްމަދުގެ ހަނދާނީ ބަށި މުބާރާތުގެ ދެވަނަ މެޗު ފަތްމިނި ޓީމާއިވާދަކޮށް ގޮމަ ޓީމުން ކާމިޔާބުކޮށްފިއެވެ.

އެރަށު ޖަމިއްޔަތުއް ސަލާޙްގެ ބަށިކޯޓުގައި ކުޅުނު މި މެޗުގައި ގޮމަ ޓީމުން ވަނީ 14 ލަނޑު 8 ފޯލި ހަދާފައެވެ. އަދި ފަތްމިނި ޓީމަށް ހެދުނީ 9 ލަނޑު 11 ފޯއްޔެވެ.

އިޝްތިހާރު

މި މެޗުގައި ފަތްމިނި ޓީމުގެ ރުޤިއްޔާ 20 ބޯޅަ ސައިކޮށް، 16 ބޯޅަ ހިފާ، 1 ލަނޑު ހެދި އިރު، އެޓީމުގެ ޙައްވަ ވަނީ 35 ބޯޅަ ސައިކޮށް، 10 ބޯޅަ ހިފާ، 2 ލަނޑު ހަދާފައެވެ. އަދި ގޮމަ ޓީމުގެ ސަޢީދާ 44 ބޯޅަ ސައިކޮށް، 20 ބޯޅަ ހިފާ، 2 ލަނޑު ހެދި އިރު، ޒީނިޔާ ވަނީ 45 ބޯޅަ ސައިކޮށް، 13 ބޯޅަ ހިފާ، 3 ލަނޑު ހަދާފައެވެ.

މި މެޗުގެ ކްއީން އޮފް ދަ މެޗުގެ މަޤާމަށް ހޮވުނީ ގޮމަ ޓީމުގެ ސަޢީދާއެވެ.