އޭޑީކޭ ޚިތާނީ ކޭމްޕު މި މަހު 24ގައި…
އޭޑީކޭ ހޮސްޕިޓަލުން ކޮންމެ އަހަރަކުވެސް ބާއްވަމުން އަންނަ ޚިތާނީ ކޭމްޕު މި ނޮވެމްބަރ މަހު 24ގައި ފެށުމަށް ނިންމައިފިއެވެ.
އެ ހޮސްޕިޓަލުން ބުނީ މިއަހަރުގެ ޚިތާނީ ކޭމްޕު އޮންނާނީ މި މަހުގެ 24ން ޑިސެމްބަރ 30އަށް ކަމަށެވެ. އަދި މިއަހަރުގެވެސް ޕެކޭޖުގެ އަގަކީ =/5000 ރުފިޔާ ކަމަށެވެ.
ރާއްޖޭގެ އެންމެ ބޮޑު އަމިއްލަ ހޮސްޕިޓަލުން ބުނީ މި ޕެކޭޖުގައި ހިމެނޭނީ ދައްކަންޖެހޭ ޑޮކްޓަރަށް އެޕޮއިންޓްމެންޓު ހަމަޖައްސައިދީ ޑޮކްޓަރަށް ދެއްކުމާއި ޚިތާނު ކުރުމަށް ކުރަންޖެހޭ ތަހުލީލުތައް ކުރުމާއި ޚިތާނު ކުރުމަށްފަހު، (ކުއްޖާ ކުޑަކަމުދިއުމުން) ގެއަށް ފޮނުވާލުމާއި ދެމެދު ކުރާ ބޭސްފަރުވާއެވެ. އަދި ކުއްޖާ ގެއަށް ފޮނުވާލުމަށްފަހު ދޭންޖެހޭ ބޭހާއި ގެއަށް ދޫކޮށްލުމަށްފަހު ޑޮކްޓަރަށް ދައްކަން ހަދާ ފުރަތަމަ ކޮންސަލްޓޭޝަން ނުވަތަ ފޮލޯ އަޕްވެސް ޕެކޭޖުގައި ހިމެނޭނެ ކަމަށެވެ.
އެހެންނަމަވެސް ކެއުން ބުއިމަށް ހިނގާ ޚަރަދާއި ޚިތާނުކުރި ކުއްޖާ ގެއަށް ދިއުމަށް ޑޮކްޓަރ ހުއްދަދީ ޑިސްޗާރޖު ކުރުމަށް ފަހު، ހޮސްޕިޓަލުގައި މަޑުކުރާ ނަމަ އެ މުއްދަތުގައި ހިނގާ ޚަރަދު މި ޕެކޭޖުގައި ނުހިމެނޭ ކަމަށް އޭޑީކޭ އިން ބުންޏެވެ.
އެ ހޮސްޕިޓަލުން އިތުރަށް ބުނީ އެ މުއްދަތުގައި ޚިތާނު ކުރާނީ ހަމައެކަނި ޕެކޭޖުގެ ދަށުން އެނދުމަތިކުރާ ކުދިން ކަމަށާއި ޕެކޭޖުގެ ބޭރުން އެ މުއްދަތުގައި ޚިތާނު ނުކުރާނެ ކަމަށްވެސް އެ ހޮސްޕިޓަލުން ބުންޏެވެ. އަދި ޚިތާނު ކުރުމުގައި އިސްކަންދޭނީ ޖާގަ ހުރި ނިސްބަތުން ނަންނޯޓުކުރާ ތަރުތީބުން ކަމަށެވެ.
ޕެކޭޖުގެ ދަށުން ޚިތާނުކުރާ ކުދިން އެކަމަށް ޚާއްޞަކޮށްފައިވާ ވޯޑެއްގައި ބައިތިއްބާ އިރު، މި ކޭމްޕުގެ އިތުރު މަޢުލޫމާތާއި ކުދިން ނަންނޯޓު ކުރުމަށް 7349082 ނުވަތަ css@adkenterprises.com އަށް އީމެއިލް ކުރައްވައިގެން ކުރިއަށް ގެންދެވޭނެ ކަމަށްވެސް އޭޑީކޭ ހޮސްޕިޓަލުން ބުންޏެވެ.
މިލިޔުން ކިޔާލުމުން
