ހަޔަރ އެޑިއުކޭޝަން މިނިސްޓަރ ދައުލަތުގެ ދެ ޔުނިވަރސިޓީއަކަށް ޒިޔާރަތް ކުރައްވައިފި
ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ޙަސަން ދައުލަތުގެ ދެ ޔުނިވަރސިޓީއަކަށް މިއަދު ޒިޔާރަތް ކުރައްވައިފިއެވެ.
މޯލްޑިވްސް ނެޝަނަލް ޔުނިވަރސިޓީއަށާއި އިސްލާމިކް ޔުނިވަރސިޓީއަށް އެމަނިކުފާނު ކުރެއްވި ޒިޔާރަތުގައި ދަރިވަރުންނާއި ލެކްޗަރުންގެ މެދުގައި ޢިލްމަށް ލޯބިކުރުމުގެ ރޫޙު އަށަގަންނަވައިދެއްވުމަށާއި އެކަމަށް އެކަށީގެންވާ މާޙައުލެއް ޤާއިމުކޮށްދެއްވުމަށް ވަނީ އެދިވަޑައިގެންފައެވެ.
މީގެ އިތުރުން ގިނަ ޢަދަދެއްގެ ތަޢުލީމީ ޤާބިލު ޒުވާނުންތަކެއް މިތަންތަނުގެ ފުރާޅުގެދަށުން ޤައުމަށް ޚިދުމަތްކުރުމަށް ނެރެދިނުމަށްވެސް ވަނީ އެދިވަޑައިގެންފައެވެ. އަދި ޔުނިވަރސިޓީތަކުގެ ޙާލަތު އަބަދުވެސް ވަރަށް ގާތުން ބައްލަވާނެކަމަށްވެސް ވަނީ ވިދާޅުވެފައެވެ.
ޚާއްޞަކޮށް މި ސަރުކާރުން ވަޢުދުވެފައިވާ މަތީ ތަޢުލީމާއިބެހޭ ސިޔާސަތުތައް ތަންފީޒުކުރުމުގައި މިދެ ޔުނިވަރސިޓީގެ ފުރިހަމަ އެއްބާރުލުން ލިބޭނެކަމަށް އުއްމީދު ކުރައްވާ ކަމަށްވެސް ވިދާޅުވިއެވެ. އަދި މި ދެ ޔުނިވަރސިޓީން މިކަމަށް އެއްބާރުލުން ދެއްވާ މިކަންކަން ކުރިއަށް ގެންދަވާނެކަމުގެ ޔަޤީންކަން އެބޭފުޅުންނަށް މިނިސްޓަރ ވަނީ ދެއްވާފައެވެ.
މިނިސްޓަރގެ އަރިހުގައި އެ މިނިސްޓްރީގެ ވަގުތީ ޕަރމެނަންޓް ސެކްރެޓަރީ ޑރ. ޢަބްދުއްރަޙީމް ޙަސަން ބައިވެރިވެވަޑައިގެންނެވި އިރު، މި ޒިޔާރަތުގައި މޯލްޑިވްސް ނެޝަނަލް ޔުނިވަރސިޓީގެޗާންސެލަރ، ވައިސް ޗާންސެލަރ އާއި އިސްލާމިކް ޔުނިވަރސިޓީގެ ވައިސް ޗާންސެލަރ އާއި ޑިޕާޓްމެންޓްތަކުގެ ޑީން އާއި އިސްވެރިންނާ ބައްދަލުކުރައްވާ ޔުނިވަރސިޓީގެ މަސައްކަތްތަކާއިބެހޭގޮތުން ވަނީ މަޝްވަރާކުރައްވާފައެވެ.
މިލިޔުން ކިޔާލުމުން
