މިނިސްޓަރ ޝިދާތާ ކުޑަހުވަދޫއަށް ރަސްމީ ދަތުރުފުޅެއް ކުރައްވައިފި
މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޝިދާތާ ޝަރީފު ދ. ކުޑަހުވަދޫއަށް ރަސްމީ ދަތުރުފުޅެއް ކުރައްވައިފިއެވެ.
ނޮވެމްބަރު 26ގައި ކުރެއްވި މި ދަތުރުފުޅަކީ އެރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީ އާ ދައުރަކަށް އެކުލަވައިލުމާއިގުޅިގެން ބޭއްވި ޙަފުލާ ޝަރަފުވެރިކޮށްދެއްވުމަށްޓަކައި ކުރެއްވި ދަތުރުފުޅެކެވެ.
މި ޙަފުލާގައި ވާހަކަފުޅު ދައްކަވަމުން އަންހެނުންގެ ތަރައްޤީއަށް މަސައްކަތްކުރާ ކޮމިޓީއަކީ އަތޮޅާއި ރަށުގެ ތަރައްޤީއަށް މުހިންމު ދައުރެއް އަދާކުރެވޭނެ ބައެއް ކަމުގައި މިނިސްޓަރ ޝިދާތާ ވިދާޅުވިއެވެ. އެހެންކަމުން މި ފަދަ ފުރުޞަތެއްގެ ބޭނުން އެންމެ ހެޔޮ ގޮތުގައި ހިފައި، އަންހެނުންނާއި އަންހެން ކުދިންގެ ރައްކައުތެރިކަމާއި ކުރިއެރުމަށް މަސައްކަތްކޮށްދެއްވުމަށް އެ ކަމަނާ އެދިވަޑައިގެންނެވިއެވެ.
މި ދަތުރުފުޅުގައި ދ. ކުޑަހުވަދޫ ކައުންސިލުގެ މެންބަރުންނާއި ކުޑަކުދިންނާއި ޢުމުރުން ދުވަސްވީ މީހުންނާއި ނުކުޅެދުންތެރިކަން ހުންނަ ފަރާތްތަކަށް ޚިދުމަތް ފޯރުކޮށްދިނުމުގައި އެ މުއައްސަސާތަކާއި ގުޅިގެން މިނިސްޓްރީން ކުރިއަށް ގެންދެވިދާނެ ހަރަކާތްތަކާ ގުޅޭގޮތުން އެ ކަމަނާ ޚިޔާލު ބަދަލުކުރެއްވިއެވެ.
މީގެ އިތުރުން އެރަށުަގއި ހުންނަ ފެމިލީ އެންޑް ޗިލްޑްރަންސް ސަރވިސް ސެންޓަރަށް ޒިޔާރަތްކުރައްވާ އެ ސެންޓަރުން ދެމުންގެންދާ ޚިދުމަތްތައް އިތުރަށް ހަރުދަނާކުރުމާއިގުޅޭ ގޮތުންވެސް ސެންޓަރުގެ މުވައްޒަފުންނާ މިނިސްޓަރ ޝިދާތާ ވަނީ މަޝްވަރާކުރައްވާފައެވެ.
މިލިޔުން ކިޔާލުމުން
