މުސްލިމުންނަށް ޚާއްޞަ ޤަބުރުސްތާނެއް އިޓަލީގައިއަޅަނީ

އިޓަލީގައި ފުރަތަމަ ފަހަރަށް މުސްލިމުންނަށް ޚާއްޞަ ވަކި ގަބުރުސްތާނެއް އެޅުމަށް ތައްޔާރުވަމުން އެބައާދެއެވެ. މި ޤަބުރުސްތާނު އެޅުމަށް މަސައްކަތް ކުރަމުން އަންނަނީ ވެރިރަށް ރޯމުގައެވެ. މި ޤަބުރުސްތާނު ބިނާކުރުމަށް ރާވާފައިވަނީ ރޯމުގެ ދެކުނުން މާދުރުނޫން ހިސާބެއްގައި އޮންނަ ”ޓްރެގްލިއެޓެއްލާ“ ކިޔާ ސަރަޙައްދެއްގައި އޮންނަ 400 ހެކްޓަރުގެ ބޮޑުމިނުގެ ފެހި ބިމެއްގައެވެ.

”ފުމިޗިނޯ“ގެ، ބައިނަލް އަޤްވާމީ ވައިގެ ބަނދަރާ ކައިރީގައި އަޅާ މި ޤަބުރުސްތާނަކީ، ދެވަނައަށް އެންމެ ބޮޑު ދީނީ އާބާދީގެ ގޮތުގައި އިސްލާމްދީން އޮންނަ އިޓަލީގައި މުސްލިމުންނަށް ޚާއްޞަކުރެވިގެން އެޅޭ ފުރަތަމަ ޤަބުރުސްތާނެވެ.

އިޝްތިހާރު

”ގާރޑްން އޮފް ޕީސް“ (އަމާން ކަމުގެ ބަގީޗާ)ގެ ނަމުގައި އަޅާ މި ޤަބުރުސްތާނުގެ މަސައްކަތް ނިމުމުން، މިހާރު ދިމާވަމުން އަންނަ ދަތިތަށް، ބޮޑުވަމުން އަންނަ މުސްލިމް އާބާދީއަށް ކުރިމަތިލާން ނުޖެހޭނެ ކަމަށް ”ދޫމްކަޓު ބެންގަލި ކޮމިއުނިޓީ އެސޯސިއޭޝަން އިން ރޯމް“ ގެ ރައީސް ”ބަޗްކޫ ދޫންކަޓު“ ބުނެއެވެ.

އިޓަލީގެ 8000 މުނިސިޕަލްޓީގެ ތެރެއިން، މުސްލިމުންގެ ޤަބުރު ވަޅުލުމަށް ހުއްދަ ދެނީ އެންމެ 58 ޤަބުރުސްތާނުންނެވެ. އެހެންކަމުން އިޓަލީގެ މުސްލިމުންނަށް މަރުވާމީހުން ވަޅުލުމުގައާއި ޖަނާޒާގެ ކަންކަން ކުރިޔަށް ގެންދަން މާފަސޭހައެއްނޫނެވެ. އަދި 2020ގައި ފެށިގެން މި އުޅޭ ކޮނޯރާ ވައިރަސްގެ ސަބަބުން މަރުވާ މީހުންގެ ޢަދަދު ވަރަށް ބޮޑަށް އިތުރުވެފައިވާ މިދަނޑިވަޅުގައި، ޤަބުރުސްތާނުތަކުން ޖާގަ ނުލިބި، މީހުންވަޅުލުމުގައި މުސްލިމުންނަށްވަނީ ވަރަށް ބޮޑެތި ގޮންޖެހުންތަކާ ކުރިމަތިލާން ޖެހިފައެވެ.

”މިބިން ގަނެވި މިތަނުގައި ޤަބުރުސްތާނު ބިނާ ކުރެވުމުން، މުސްލިމުން މައްކާއާއި ވީފަރާތަށް (ޤިބްލަ ވީފަރާތަށް) ވަޅުލެވުމާއި، ޖަނާޒާގެ ކަންކަން އިސްލާމީ ހަމަތަކުގެ މަތިން ކުރިޔަށް ގެންދެވޭނެ“ ”ބަޗްކޫ ދޫންކަޓު“ ބުނެއެވެ. މިކަންކަމަކީ މިއަދާ ހަމައަށް އިޓަލީގައި މުސްލިމުންނަށް ލިބޭ ފުރުޞަތު ތަކެއްނޫނެވެ.

އެޤައުމުގެ އެކި ސަރަޙައްދުތައް ބެލުމަށްފަހު އެންމެ ކަމުދާ ތަނެއްގެ ގޮތުގައި ލިބުނު ”ޓްރެގްލިއެޓެއްލާ“ގެ މިބިން ގަންނަން ލިބޭ އަގަކީ 7 މިލިއަން ޔޫރޯއެވެ. (އެއީ 7.8 މިލިއަން އެމެރިކާ ޑޮލަރެވެ.) 35000 މެންބަރުން ހިމެނޭ ”ދޫމްކަޓު ބެންގަލި ކޮމިއުނިޓީ އެސޯސިއޭޝަން އިން ރޯމް“ އިންވަނީ މި ބިންގަތުމަށް އެންމެން ގުޅިގެން ފަންޑު ހޯދުމަށް މުޅި ދުނިޔޭގެ މުސްލިމް އާބާދީ ކަމުގައިވާ 2.6މިލިއަން މުސްލިމުންގެ ކިބައިން އެދިފައެވެ.

ޤުރްއާން ސްކޫލަކާއި، ކުޅިވަރު މަރުކަޒަކާއި، އިސްލާމީ ހަމަތަކުގެ މަތިން ޖަނަވާރު ކަތިލާ ތަނެއްވެސް ހިމަނައިގެން ހަދާ މި ޤަބުރުސްތާނު ސަރަޙައްދުގެ ކުރެހުންތަކުގެ ”ބްލޫ ޕްރިންޓް“ މިހާރު ވަނީ ހަދާނިމިފައެވެ. އަދި އެކި ސަރަޙައްދުން މިހާރު ފަންޑު ލިބެން ފަށާފައިވާކަމަށްވެސް އެކަމާއުޅޭ އިސްފަރާތްރަކުން ހާމަކުރެއެވެ.

އިޓަލީގެ ބައެއް ފަރާތްތަކުން މިކަމާ އިދިކޮޅު ހަދާ، މުސްލިމުން މިކަހަލަ ތަނެއްގެ ތެރެއިން އެބައިމީހުންގެ ދީނާ ހަޟާރަތު ފަތުރާނެ ކަމަށް ބުނަމުން ދާއިރު، އަނެއްބަޔަކު ބުނަމުން އަންނަނީ މުސްލިމުންނަށް ދިމާވެފައިވާ މައްސަލައަށް ހައްލެއްވެސް ބޭނުންވާ ކަމުގައެވެ. އެގޮތުން ”ބަރީ“ގެ މޭޔަރު އަދި ”ނޭޝަނަލް އެސޯސިއޭޝަން އޮފް އިޓަލިއަން ކޮމިއުންސް“ގެ ރައީސް ”އެންޓޯނިއޯ ޑެކާރޯ“ ބުނަނީ:- ”މުސްލިމުން އެބުނާ ޤަބުރުސްތާނަށް ޖެހިފައިވާ ބޭނުން، އަހަންނަށް ވަރަށް ރަނގަޅަށް ވިސްނޭ! އަދި މަށަށް ހީވަނީ މިހާރު މިކަމުގެ ޙައްލެއް ހޯދުމުގެ ވަގުތު އައިސް ޖެހިއްޖެހެން!“

ދިވެހިންގެ ތެރެއިން ކޮންމެވެސް ބަޔަކު އިސްނަގައިގެން އިޓަލީގައި ބިނާކުރަންއުޅޭ ޤަބުރުސްތާނުގެ ބިންގަތުމަށް ފަންޑެއް ހޯދުންއެއީ ރަނގަޅު ކަމެކެވެ. އިރާދަ ކުރެއްވިއްޔާ، އެކަމަށް ކުރެވޭ ހޭދައަކީ ﷲގެ ހަޟްރަތުގައި މަޤްބޫލު ވެގެން ދާނެ ހޭދައެއްކަމުގައި ވާނެއެވެ.