މައިންޒް އަތުން ބަލިވެ ބަޔާނަށް ލީގު ހޯދުމަށް އިތުރު އިންތިޒާރެއް ކުރަން ޖެހިއްޖެ

ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން މައިންޒް އަތުން ބަލިވެ ޖަރުމަން ލީގު ކާމިޔާބުކުރުމަށް އެންމެ ފަހުގެ ޗެމްޕިއަން ބަޔާން މިއުނިކަށް އިތުރު އިންތިޒާރެއް ކުރަން ޖެހިއްޖެއެވެ.

މިރޭ މައިންޒްގެ އަމިއްލަ ދަނޑުގައި ކުޅުނު މެޗުން މައިންޒް އަތުން ބަޔާން ބަލިވީ 1-2 ގެ ނަތީޖާއިންނެވެ.

އިޝްތިހާރު

މި މެޗުގެ ފުރަތަމަ ހާފުގައި މައިންޒް އިން ވަނީ މޮޅު ކުޅުމެއް ދައްކާފައެވެ. އެގޮތުން މެޗުގެ ވަރަށް ކުރީކޮޅު މައިންޒުން ވަނީ ލަދޫ ޖަހާ ލީޑު ނަގާފައެވެ. މެޗު ފަށައިގެން ތިންވަނަ މިނެޓުގައި މައިންޒްއަށް ލީޑުނަގައިދިން މި ލަނޑު އެ ޓީމަށް ކާމިޔާބުކޮށްދިނީ ޖޮނަތަން ބާކާޓެވެ. އަދި މެޗުގެ 37 ވަނަ މިނެޓުގައި ރޮބިން ކުއައިސަން ވަނީ އެޓީމުގެ ދެވަނަ ލަނޑެއް ޖަހައި، މައިންޒުގެ ލީޑު ފުޅާކޮށްދީފައެވެ.

ދެ ލަނޑުގެ ލީޑެއްގައި އޮވެ މައިންޒްއިން މެޗުގެ ފުރަތަމަ ހާފު ނިންމާލިއިރު، މެޗުގެ ފަހުހާފަށް ކުޅެން ނިކުމެ ބަޔާންއިން ވަނީ ކުޅުން ރަނގަޅުކޮށް ގިނަ ހަމަލާތަކެއް އުފައްދާފައެވެ. ނަމަވެސް އެޓީމަށް މެޗުގައި ކާމިޔާބު ކުރެވުނު ހަމައެކަނި ލަނޑު ކާމިޔާބުކުރެވިފައިވަނީ މެޗުފެ ފަހު ހާފުގެ އިތުރު ވަގުތުގައެވެ. މި ލަނޑު ބަޔާނަށް ކާމިޔާބުކޮށްދިނީ ފޯވާޑް ރޮބަޓް ލެވަންޑޯސްކީއެވެ.

މި ނަތީޖާއާއެކު ބަޔާން އޮތީ ތާވަލުގެ އެއްވަނައިގައި ކުޅުނު 31 މެޗުން ލިބުނު 71 ޕޮއިންޓާއެކުއެވެ. ދެވަނައިގައި އޮތް އާރްބީ ލައިޕްޒީގަށް 30 މެޗުން ލިބިފައިވަނީ 61 ޕޮއިންޓެވެ. އަދި ބަޔާން ބަލިކުރި މައިންޒް އޮތީ ތާވަލުގެ 12 ވަނައިގައި 30 މެޗުން 34 ޕޮއިންޓާއެކުއެވެ.