އޭދަފުށީގައި ހެދި ޑްރައިވިންގ ޓްރެކް ހުޅުވައިފި
އެއްގަމު އުޅަނދު ދުއްވުމުގެ ޓެސްޓް ހަދަން ބ. އަތޮޅު ކައުންސިލުން އޭދަފުށީގައި ތައްޔާރުކުރި ޑްރައިވިން ޓެރެކް ހުޅުވައިފިއެވެ.
ރަށު ހުޅަނގު ސަރަހައްދުގައި ތައްޔާރުކުރި ޑްރައިވިންގ ޓްރެކް ހުޅުވައިދެއްވީ މިކަމަށްޓަކއި ބޭއްވި ޚާއްޞަ ރަސްމިއްޔާތެއްގައި ބ. އަތޮޅު ކައުންސިލުގެ ރައީސް މަބުރޫކް ނަސީރު އެވެ.
މި ރަސްމިއްޔާތުގައި ވާހަކަ ދައްކަވަމުން މަބްރޫކް ވިދާޅުވީ ބ. އަތޮޅު ކައުންސިލުންދޭ ޚިދުމަތުގެ ފެންވަރު ރަނގަޅުކޮށް އެ ޚިދުމަތް މެދުނުކެނޑި ރައްޔިތުންނަށް ދިނުމަށް މިހާރުން މިހާރަށް ކުރަންޖެހޭ ވަރަށް ގިނަ މަސައްކަތް އެބަހުރި ކަމަށެވެ. އަދި މިއީ އެކަމުގެ ކުޑަ ފެށުމެއް ކަމަށެވެ.
”މިއީ ގާތްގަޑަކަށް ދޮޅު މިލިއަނެއްހާ ރުފިޔާގެ މި މަސައްކަތް. އެކަމަކު މީގެ ދެބައިކުޅަ އެއްބައިހާ ކުޑަ އަގަކުން ނިންމާލެވުނީ ކައުންސިލު އިދާރާގެ މުވައްޒަފުންގެ ބުރަ މަސައްކަތުން“ މަބްރޫކް ވިދާޅުވިއެވެ.
ޑްރައިވިންގ ޓްރެކްގެ ސަބަބުން ލައިސަންސް ނެގުމަށް މިހާރު ދާ ފަރާތްތަކުގެ އުދާސްތަކަށް ހިތްހަމަޖެހުން ލިބޭނެކަމަށްވެސް މަބްރޫކް ވިދާޅުވިއެވެ. އަދި އަތޮޅު ކައުންސިލުން ފޯރުކޮށްދޭ ޚިދުމަތުގެ ފެންވަރު ރަނގަވެގެންދާނެ ކަމަށްވެސް ވިދާޅުވިއެވެ.
ބ. އަތޮޅުގެ ރަށްރަށުގައި ދިރިއުޅޭ ފަރާތްތަކުން އެއްގަމުގައި ދުއްވާ އުޅަނދުފަހަރު ދުއްވުމުގެ ޢަމަލީ އިމްތިޙާން ބ. އަތޮޅު ކައުންސިލުގެ ބެލުމުގެ ދަށުން އޭދަފުށީގައި މިވަގުތު ބާއްވަމުން އަންނަނީ އޭދަފުށީ ރަސްމީ ސްޓޭޖް ސަރަޙައްދުގެ ވެލި ބިމުގައެވެ.
އެ ސަރަޙައްދުގައި ޑްރައިވިންގ ޓެސްޓް ހަދާ ފަރާތްތަކުން ތަފާތު އެކި މައްސަލަތައް މީގެ ކުރިން އަންނަނީ ޝަކުވާތައް ކުރަމުންނެވެ.
ޑްރައިވިންގ ޓެސްޓް ހަދާ ޓްރެކް ހުޅުވުމަށް ބޭއްވި ރަސްމިއްޔާތުގައި އޭދަފުށީގައިހުރި ސަރުކާރު އޮފީސްތަކުގެ އިސް ބޭފުޅުން ބައިވެރިވެވަޑައިގެންނެވިއެވެ.
މިލިޔުން ކިޔާލުމުން
