އައިލެންޑް އިލެކްޓްރިސިޓީ ޑޭޓާ ބުކް ލޯންޗުކޮށްފި

އައިލެންޑް އިލެކްޓްރިސިޓީ ޑޭޓާ ބުކް 2018 ލޯންޗުކޮށްފިއެވެ.

މި ފޮތް ނެރެދެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ޠާރިޤް އިބްރާހީމެވެ.

އިޝްތިހާރު

ދިވެހިރާއްޖޭގެ ހަކަތައިގެ ދާއިރާއާއި ބެހޭ މަޢުލޫމާތު އެއްކޮށް ”އެނަރޖީ އައުޓްލުކް ފޮރ އިންހެބިޓެޓް އައިލެންޑް 2013“ ގެ ނަމުގައި ފުރަތަމަ ފަހަރަށް މިފަދަ ފޮތެއް މި މިނިސްޓްރީއިން ވަނީ ޝާއިޢުކޮށްފައެވެ.

”އައިލެންޑް އިލެކްޓްރިސިޓީ ޑޭޓާ ބުކް 2018″ އަކީ މި ސިލްސިލާގެ 4 ވަނަފޮތެވެ. މި ފޮތުގައި ރާއްޖޭގެ މީހުން ދިރިއުޅޭ ރަށްރަށުގައި ކަރަންޓު ޚިދުމަތް ފޯރުކޮށްދިނުމަށް ޤާއިމުކޮށްފައިވާ ނިޒާމުތަކުގެ މުހިއްމު މަޢުލޫމާތުތަކާއި ހަކަތައިގެ ދާއިރާއަށް ބޭނުންތެރި ގިނަ ތަފާސްހިސާބު ތަކެއް ހިމެނިފައިވެއެވެ.

މީގެ އިތުރުން ރާއްޖޭގެ ބައެއް ރިސޯޓުތަކުގައި ކަރަންޓު އުފައްދައި ބޭނުންކުރެވުނު މިންވަރުގެ މަޢުލޫމާތާއި ވޭތުވެދިޔަ 10 އަހަރުގެތެރޭގައި ރާއްޖޭގައި އިޔާދަކުރަނިވި ހަކަތައިގެ ދާއިރާއިން ހޯދިފައިވާ ކުރިއެރުންތަކާއި ރާއްޖޭގެ ބައެއް ރިސޯޓުތަކުގައި ބޭނުންކުރަމުންދާ އިއާދަކުރަނިވި ހަކަތައިގެ އެކިއެކި ވަސީލަތްތަކުގެ މަޢުލޫމާތުވެސް މިފޮތުގައި ވަނީ ހިމަނާފައެވެ.

”އައިލެންޑް އިލެކްޓްރިސިޓީ ޑޭޓާ ބުކް 2018“ ގެ ތަފާސްހިސާބު ދައްކާގޮތުން 2017 ވަނަ އަހަރުގެތެރޭގައި 447,555  މެޓްރިކް ޓަނުގެ ޑީސަލް، 57,730 މެޓްރިކް ޓަނުގެ ޕެޓްރޯލް، 41,666 މެޓްރިކް ޓަނުގެ އޭވިއޭޝަން ގޭސް، އަދި 14,483 މެޓްރިކް ޓަނުގެ ކެއްކުމަށް ބޭނުންކުރާ ގޭސް ވަނީ ރާއްޖެއަށް އެތެރެކޮށްފައެވެ.

2017 ވަނަ އަހަރު މީހުން ދިރިއުޅޭ ރަށްރަށުގައި 704 ގިގަވޮޓްއަވަރގެ ކަރަންޓު ހަކަތަ ބޭނުންކޮށްފައިވާ އިރު، 56.9 އިންސައްތަ ބޭނުންކޮށްފައިވަނީ މާލެ، ހުޅުމާލެ އަދި ވިލިމާލޭގައެވެ. އަދި ރާއްޖޭގެ މީހުން ދިރިއުޅޭ ހުރިހާ ރަށެއްގައި 240 މެގަވޮޓް ކެޕޭސިޓީގެ ޖެނެރޭޓަރު ބެހެއްޓި، ވޭތުވެދިޔަ އަހަރުތަކުގެ ތެރޭގައި އިރުގެ އަލިން ހަކަތަ އުފައްދާ މިންވަރުވަނީ 11 މެގަވޮޓަށް އިތުރު ކުރެވިފައެވެ.

މި ފޮތް މިނިސްޓްރީ އޮފް އެންވަޔަރަންމަންޓް އެންޑް އެނަރޖީގެ ވެބްސައިޓް http://www.environment.gov.mv/ އިން ޑައުންލޯޑް ކުރެވެން ހުންނާނެއެވެ.